Ditën e djeshme kryetari i Bashkisë së Tiranës, Erion Veliaj na tregoi se si më në fund pas shumë kohësh u arrit të bëhej një marrëveshje me artistët për nisjen e negociatave për ndërtimin e Teatrit të ri Kombëtar. Menjëherë pas kësaj u publikua edhe lista e 65 artistëve të cilët ranë dakord për prishjen e teatrit, por duke pasur parasysh disa kushte të përcaktuara prej tyre.
Mirëpo pjesë e listës së 65 aktorëve që ranë dakord për prishjen teatrit ka qenë edhe aktorja Pavlina Mani dhe bashkëshorti i saj, Piro Mani, edhe pse ata prej vitesh jetojnë në SHBA.
Në një rrëfim për “GSH” aktorja e madhe ka thënë se firmat e tyre janë falsifikuar.
“Përderisa në këtë punë ka futur hundët politika, ne nuk prononcohemi për asgjë, Pirro Mani ka 10 vjet që s’ka lëvizur nga Amerika. E çfarë firme mund të ketë vënë ai kur s’është këtu?! Lëreni të qetë se është në fund të viteve të jetës së tij, është i sëmurë. Ne nuk merremi me këto gjëra, aty në plan të parë nuk është çështja te ndërtimi i teatrit, aty bëhet luftë politike, ne jemi kundër politikës. Me asnjë parti nuk jemi, si Pirro si unë. Ne jemi artistë nuk jemi politikanë.
Ne jemi për teatër, të ekzistojë teatri. Të ekzistojë edhe një teatër i ri, godinë e re, të ekzistojnë 2-32 teatro për siç e ka gjithë bota”- ka thënë Pavlina.
