Kryebashkiaku Erion Veliaj dhe bashkëshortja e tij Ajola Xoxaj pritet që në muajin shtator të bëhen prindër për herë të parë. Sikurse zbuloi “Iconstyle.al” ata do të bëhen prindër të një djali.
Ndërkohë që janë duke shijuar këtë periudhë të ëmbël Erioni dhe Ajola kanë filluar që tani që të jenë më të kujdesshëm kur bëhet fjalë për fëmijët. Në një lidhje telefonike për emisionin “Sokol Balla live”, në “INRadio”, Erioni tregoi se sa të përgjegjshëm e ka bërë fakti që do të bëhet baba. Madje ai tregoi se tashmë për çdo punë kujdeset dyfish pasi tregohet më i kujdesshëm ndaj fëmijëve.
I pyetur për emrin e djalit, Veliaj tha se ende nuk e kanë vendosur, por fakti që do të bëhet baba e ka transformuar dhe e ka bërë edhe më të ndjeshëm.
“S’kemi emër akoma, por sigurisht që tani më ka transformuar, edhe pse unë kam qenë shumë i ndjeshëm për fëmijët. Kam qenë shumë i vëmëndshëm, por tani jam bërë disa herë më i vëmëndshëm. Sot kur po vija në punë, po sigurohesha që tek Sheshi Willson po bëheshin disa rregullime për uljen e trotuarit dhe po thoja me vete, po karroca kalon këtu? Kam filluar të vë re shumë gjëra të vogla që ndoshta i vinin re vetëm ata që kishin fëmijë. Kështu që si Erion besoj se fëmija do të më bëjë njeri më të mirë”, tha Veliaj në këtë intervistë telefonike.
