Fenomeni i ndarjes së fëmijve nga prindërit, të cilët po përpiqen të kalojnë ilegalisht kufirin është kthyer në një nga fenomenet më problematike të momentit në Shtetet e Bashkuara të Amerikës.
Kjo ngjarje e trishtë ka prekur mbarë botën dhe ka bërë të reagojnë shumë nga figura e njohura, madje edhe ato që e kanë kaluar vetë këtë dramë. Një nga reperet më të famshme në botë ka treguar historinë e saj të fëmijërisë. Nicki Minaj ka ndarë për të gjithë historinë e saj, ku ajo pohon se kishte shkuar në Shtetet e Bashkuara të Amerikës si emigrante ilegale së bashku me prindërit e saj.
“Kur erdha në këtë vend si emigrante ilegale isha vetëm 5 vjeçe. Nuk mund ta imagjinoj tmerrin që do të ndieja nëse do më largonin prindërit duke qenë 5 vjeçe në një vend të huaj. Kjo është shumë e frikshme për mua. Ju lutem ndalni. E imagjinoni dot tmerrin dhe panikun që ndjejnë këta fëmijë, që nuk e dinë nëse i kanë apo jo gjallë prindërit dhe nëse do t’i shohin më…”, shkruan reperja në postimin e saj në Instagram.
Kjo çështje i ka prekur të gjithë, madje ka bërë që të reagojë edhe vetë zonja e parë të SHBA-ve, e cila deklaroi se ky fenomen është kthyer në një problem shumë të madh dhe se do të merren të gjitha masat për t’i dhënë një zgjidhje.
