Nga dita në ditë Instagram po shndërrohet në një ndër rrjetet sociale më të përdorura. Ai po bëhet gjithmonë e më shumë praktik dhe po shkon drejt video-ve.
Sot kompania ka publikuar një aplikacion të ri të quajtur IGTV, përmes të cilit do të keni mundësi të ngarkoni video deri në një orë. Video-t do të shfaqen të plota në ekran dhe do të jenë më të gjata.
Ju mund të hyni në IGTV nëpërmjet dy mënyrave: ose përmes butonit që ndodhet lart në të djathtë të llogarisë suaj, ose duke shkarkuar programin më vete. Pasi të keni ndjekur njërën prej këtyre dy rrugëve ju do të keni mundësi të shikoni video që zgjasin deri në një orë. Gjithashtu ju mund të ngarkoni edhe video-t tuaja aty.
Ekzistojnë katër kategori të ndryshme për videot-t: For You, Following, Popular dhe Countinue Watching. Gjithashtu do të ketë edhe kanale personale të VIP-ave, si Selena Gomez apo Kim Kardashian, të cilat pritet që të jenë edhe më aktive se më parë.
“Në IGTV krijues janë kanalet. Kur të ndiqni një krijues në Instagram, kanali i tyre IGTV do të shfaqet për ju që ta shikoni. Çdokush mund të jetë krijues, mund të ngarkoni video-t tuaja në IGTV në aplikacion ose në internet për të hapur kanalin tuaj”, thotë Kevin Systrom nëpërmjet një njoftimi për shtyp.
