Industria e muzikës u trondit ditën e hënë, pasi u vra me armë zjarri reperi 20-vjeçar XXXTentacion. Reperi ishte duke blerë një motor në Floridën e Jugut dhe teksa po kthehej për në makinën e tij nga dyqani, dikush kaloi pranë dhe e qëlloi me armë.
Ai mësohet se kishte disa armiq, por sipas mediave amerikane nuk kishte kërcënime mes tij dhe personave të tjerë.
TMZ shkruan se, dëshmitarët kishin treguar që ishte marrë një çantë “Louis Vuitton” nga makina e tij.
Reperi kishte probleme të shumta ligjore dhe ishte në pritje të gjyqit për akuzën e dhunës në familje ndaj të dashurës së tij shtatzënë. XXXTentacion po përballej me një sërë akuzash për krime të ndryshme, ndërsa prokurorët e akuzuan për manipulimin e dëshmitarëve.
Reperi ishte në arrest shtëpie, por gjyqtarët e kishin lejuar që të niste një turne koncertesh.
XXXTentacion ishte një artist i respektuar për talentin e tij në muzikë. Kanye West i bëri një dedikim, ku shkroi:
“U prehsh në paqe. Nuk të thash kurrë sesa shumë më frymëzove kur ishe këtu, faleminderit që ekzistove”.
Burimi: TMZ
