“Rashë nga makina”! Këto ishin fjalët e fundit të Anxhela Meçanit sipas mediave italiane, para se të ndërronte jetë në spital. Me këto fjalë duket sikur donte të fshihte dikë apo të fshihej prej dikujt.
20-vjeçarja shqiptare u gjet e rrahur dhe e hedhur në mes rrugës në Torino më 10 qershor.
“La Stampa” shkruan sot se vajzës i është gjetur një dokument identifikimi në rrobat që mbante veshur, por edhe telefoni celular, të cilin e kanë sekuestruar tashmë hetuesit ndërsa po kërkohet makina nga e cila vajza është parë të hidhet.
Hetimet janë përqendruar edhe në pistën që Anxhela mund të jetë hedhur vetë nga makina. Sipas tyre, një bandë e organizuar, nga ato që i përdorin e më pas i hedhin prostitutat në rrugë, nuk i braktisin viktimat e tyre me dokumente, madje edhe me telefon në xhep.
Shkurtin e kaluar ajo ishte martuar, por pak muaj më vonë ishte larguar nga shtëpia dhe kishte humbur çdo lidhje me bashkëshortin e saj italian.
“Është barbare mënyra në të cilën e kanë vrarë. Nuk dija asgjë. Unë dhe Anxhela ishim ndarë prej disa muajsh. Ajo kishte ikur nga shtëpia, kishte marrë këtë vendim dhe unë e kisha respektuar”, ka treguar ish-bashkëshorti i saj për mediat italiane.
Pasditen e së hënës, Massimiliano telefonoi partnerin e ri të 20-vjeçares, pa ditur asgjë se çfarë kishte ndodhur.
“Më tha vetëm që nuk mund të fliste, që ishte në polici dhe se e kishin vrarë. Fillimisht mendova një aksident. Ishte prostitutë? Jo për sa kisha unë dijeni. Kur rrinte me mua në Ravenna, nuk kam kuptuar kurrë asgjë. Pas kësaj nuk di se çfarë mund të ketë bërë. Ishte një vajzë gjithnjë e qeshur. Nuk meritonte këtë fund, ishte kaq e re…”, shprehet Massimiliano.
Që nga fillimi i muajit maj, vajzat që shesin trupin me 30 euro rreth zonës së Stupinidit e kujtojnë atë si “njëra prej të rejave” në atë zonë. Ka shumë gjasa që edhe mbrëmjen e së shtunës ajo të ishte në punë, kur makina i ndaloi tek këmbët dhe e ftoi brenda. Nga vendi ku qëndrojnë prostitutat deri në vendin ku është gjetur trupi i saj nuk është më larg se 2 kilometra.
Burimi: Panorama
