Familjen e Çlirim Shahollit e ka përpirë skamja dhe tragjedia. Me nusen nën dhe, e të birin pas hekurave, nëna dhe babai i autorit të krimit, janë të detyruar të kujdesen për fëmijët e çiftit. Në një intervistë për gazetën “Panorama”, prindërit e 42-vjeçarit janë shprehur se e kanë braktisur djalin në fatin e tij, pasi i mori jetën bashkëshortes Ardjana Shaholli, nënë e gjashtë fëmijëve, mbrëmjen e së premtes në qytetin e Durrësit. Halli më i madh për dy prindërit, është sesi do të ushqejnë 3 nga fëmijët e të birit, me pensionin e tyre minimal, ndërsa tre fëmijët e tjerë janë në përkujdesjen e shoqatës sociale në Golem.
“E kemi bërë lanet djalin, nuk e mbështesim. Fëmijët do të qëndrojnë me ne, do të bëjmë si të bëjmë, do ushqehemi me pensionin tonë. Djali të vuajë për atë që bëri. Ne kemi pensione minimale. Kishin mbi një vit që kishin sherre, djali herë pas here pinte. Ata të dy kanë pasur sherre me njëri-tjetrin, por nuk e mendonin që do të arrinte deri këtu. Nuk ia falim djalit këtë që bëri, la fëmijët pa nënë” – është shprehur babai i Çlirim Shahollit.
Ata japin një version ndryshe të ngjarjes. Sipas prindërve, vajza e tyre ka gjetur të shtrirë në tokë Ardjanën kur erdhi nga puna ndërsa autori Çlirim Shaholli ishte larguar nga vendi i ngjarjes. Ndërkohë që sipas deklaratave të publikuara më herët, ka qënë autori ai që ka shoqëruar menjëherë 40-vjeçaren Ardjana Shaholli në spital, por ndrroj jetë si pasojë e plagëve të marra në kokë.
