Vetëm katër ditë pas vrasjes tragjike të 19-vjeçares Xhuljeta Çuni nga Xhaferr Mata, i cili dyshohet të ketë pasur një histori dashurie me të, zbulohet edhe arsyeja përse pas disa denoncimeve, e reja nuk kishte arritur të merrte një urdhër mbrotjeje. 19-vjeçarja kishte denoncuar në Polici, përndjekjen dhe dhunën psikologjike nga ish i dashuri saj Xhaferr Mata, një muaj përpara se ky i fundit ta qëllonte me dy plumba pas shpine duke e lënë të vdekur. Gazeta “Panorama” shkruan se ligji nuk parashikon lëshimin e menjëhershëm të urdhrit të mbrojtjes, në rastet kur nuk është në një marrëdhënie familjare apo bashkëjetuese me autorin. Gjithsesi, parashikon se në rastet kur përndjekja është e përsëritur dhe i shkakton ankth e frikë të dëmtuarës, autori duhet të arrestohet. Mirëpo në rastin e maturantes Xhuljeta Çuni, nuk kishte ndodhur kështu. Autori Xhaferr Mata ishte proceduar në gjendje të lirë nga Policia. Disa ditë më pas, e shtyrë nga familjarët dhe mentaliteti edhe 19-vjeçarja kishte tërhequr denoncimin e bërë në Polici. Dëshmia e familjarëve të vajzës dhe djalit do të meret nga Policia, për të zbardhur rrethanat dhe motivin e ngjarjes së rëndë.
Ditën e premte, 31-vjeçari Xhafer Mata qëlloi me dy plumba pas shpine ish të dashurën e tij Xhuljeta Çuni, në zonën e “Don Boskos” në Tiranë. Më pas 31-vjeçari ka qëlluar veten, e ndërroi jetë në Spitalin e traumës një orë më pas.
