Presidenti i Shqipërisë, Ilir Meta ka pritur sot në ambientet e presidencës këngëtarin që na përfaqësoi në “Eurovision”, Eugent Bushpepa për ta falenderuar për përfaqësimin dinjitoz në Festivalin Europian.
Vetë Presidenti ka bërë të ditur takimin me rrokerin shqiptar nëpërmjet një postimi në profilin e tij zyrtar Facebook.
“Falenderova sot me mirënjohje, yllin e rokut dhe muzikës moderne shqiptare,Eugent Bushpepa, për përfaqësimin dinjitoz të Shqipërisë në Eurovision.
Me zërin e tij unik dhe falë talentit të papërsëritshëm, Genti lartësoi muzikën dhe gjuhën e mrekullueshme shqipe në skenën europiane, duke na bërë krenarë të gjithëve” – ka shkruar Meta për takimin me Bushpepën.
Në foto Presidenti bën shenjën e rrokerëve ashtu si Genti në shenjë mbështetje dhe vlerësimi për këngëtarin.
Bushpepa pati një përformancë mbresëlënëse në “Eurovizion” dhe u klasifikua në vend të 11-të.
Gjithashtu mediat e huaja e cilësuan si zërin më të mirë mashkullor në këtë festival.
