Prej 11 vitesh, Zamira Kita është drejtoreshë e Teatrit të Korçës si dhe ndër aktoret më të mira shqiptare. E ftuar në një bisedë me gazetaren Rudina Magjistari në televizionin”Klan”së bashku me vajzën e saj Enirën, ajo tregoi marrëdhënien e veçantë nënë e bijë.
Duke folur për momentet më të vështira të jetës të saj, aktorja rrëfeu se pas lidhjes së vajzës kishte rënë në depresion.
“Pas lindjes së vajzës nuk kam qenë shumë e ngarkuar sepse isha tërhequr nga teatri. Nuk e kam thënë ndonjëherë, por pas lindjes unë kam kaluar një depresion shumë të rëndë, ka qenë shumë i vështirë për mua, gati 40 ditë. Ka qenë shqetësim shumë i madh, për mua dhe për familjen e Benit, për ne të dy. Na u duk një periudhë pa zgjidhje, më dukej sikur do të çmendesha përfundimisht, sikur s’do ta rrisja dot vajzën, ose do të vdisja. Ishte depresion. Kam shkuar në shumë mjekë, por fatmirësisht Zoti më dha Enirën të urtë sepse nuk di si do kisha reaguar. Që në atë periudhë filloi tërheqja nga teatri, u mbylla në vetvete. Pas 40 ditësh më kaloi depresioni dhe aty kuptova që kisha sjellë në jetë një fëmijë që e kisha aq shumë të dëshiruar. Pastaj fillova të nxjerr gjërat që i kisha përgatitur Enirës, kuvertat, bluzat dhe fillova ta vesh bukur. Më pas nuk i jam ndarë asnjë çast Enirës, madje madje ne flemë bashkë sepse edhe Enira është shumë e lidhur me mua”, përfundoi Zamira Kita .
