Sa herë që flitet për muzikën, argumenti kryesor është nëse një këngëtar/e e meriton apo jo famën e marrë. Gjatë evolucionit të muzikës kemi parë shumë këngëtarë të vijnë dhe të ikin, disa prej tyre jo vetëm që kanë lënë emrin e tyre, por kanë dhënë një ndikim afatgjatë.
Këngëtarë nga të gjitha zhanret, “rock” apo “pop”, ndryshuan jetën tonë me artin e tyre, duke nga shoqëruar në momentet më të gëzuara apo të trishtuara.
Sot “iconstyle.al” vendosi të sjellë ndërmend disa nga emrat, që i mungojnë muzikës shqiptare, disa për vlerat e tyre vokale dhe disa për hir të hiteve që kanë bërë vite më parë.
Alketa Vejsiu
Është një personazh që nuk i është larguar ekranit shqiptar për asnjë moment, por i ka munguar skenës së muzikës. Alketa Vejsiu nisi të këndonte që në moshën e adoleshencës, por vendosi që të kishte prioritet gjithmonë moderimin e spektakleve të njohura. Kënga e fundit me të cilën u prezantua është “Po s’më puthe ti”, e vitit 2004. Pavarësisht se herë pas here performon këngë të famshme, nuk ka ardhur me një hit të sajin.
Julka Gramo
Tashmë ka kaluar në statusin e moderatores, atë të nënës së dy djemve dhe të bashkëshortes së DJ Andit. Ndërsa prezanton një emision në “NRG Radio”, Julka është shkëputur nga muzika që në vitin 2014, pas publikimit të këngës “Mengjesi pa ty”.
Ardian Trebicka
Me siguri e kishit harruar të gjithë, por këngët e tij na kanë shoqëruar prej vitesh deri në 2013-n. Artisti 51-vjeçar nuk realizoi më asnjë këngë prej “E imja je”.
Orinda Huta
Orinda depërtoi në tregun artistik në fillim të viteve 2000, por prej kohësh nuk ka sjellë më asnjë hit të ri. Në vitin 2014 ajo prezantoi dy këngë të suksesshme, “Boom Boom”, në maj dhe “Te amo” në korrik. Huta i është fokusuar karrierës si moderatore, momentalisht në televizionin “Vizion Plus”, ndërsa flitet për zhvendosjen e saj te “Tv Klan”.
Tuna
Prej 2 vitesh ajo iu fokusua lidhjes me Patris Berishën dhe më pas me krijimin e familjes, pasi një vit më parë erdhi në jetë vogëlushi Tian. Në prill të 2016-s ajo publikoi këngën “Dy Tima”, për të bërë më pas një pushim nga skena shqiptare. Deri kur, nuk e dimë!
Malda Susuri
Kanë kaluar vite që kur këngëtarja Malda Susuri preku zemrat e të gjithë të dashuruarve me hitin “Dashuri e hidhur”. Kënga u pëlqye dhe u memorizua aq shumë nga publiku, saqë të gjithë e dinë dhe e njohin edhe sot. Në një intervistë për “Iconstyle.al” në shtator të 2017-s, ajo tregoi se do të rikthehet me një projekt nga Faton Dolaku.
Grupi Aurora
Grupi Aurora u formua në vitin 2002, me iniciativën e 4 të rinjve: Nazmi Sfishta, Alban Mehmeti, Ylli Valla dhe Ylli Zajmi. Ndërsa e gjitha nisi me këngën “Ëndrra e Lotit”, ata morën famë me hitin “Le-Le Kaçurrele”, me të cilin morën pjesë në vitin 2005 në festivalin “Kënga Magjike”. Në dhjetor të 2014-s, Aurora mori pjesë në Festivali i 53-të në RTSH, me këngën “Maria”.
Grupi LRC
Grupi LRC (Lezha Rappers Clan) u themelua në vitin 2003 dhe u bënë pjesë e konkurseve më të njohura të muzikës shqiptare, si “Top Fest” dhe “Kënga Magjike”. Ndër hitet e tyre më të njohur kujtojmë atë “Sensuale” dhe kënga e tyre e fundit ishte “Ndjenjë e sëmurë” e publikuar në 2012-n.
Anjeza Shahini
Ajo ishte përfaqësuesja e parë e Shqipërisë në Eurovizion, në vitin 2004. Karriera e Anjeza Shahinit në muzikë nisi me konkursin “Ethet e së Premtes Mbrëma” për t’u ndalur në 2014-n, me këngën “Energji”.
Produkt 28
Produkt 28 u krijua me 28 nëntor 2002 dhe ishte i përbërë nga tre anëtarë: Alban Kondi, Fabian Basha dhe Turjan Hyska. Tre djemtë morën pjesë në disa spektakle dhe fituan disa çmime, për ta mbyllur në vitin 2009, me këngën “Inati”, në bashkëpunim me Anila Mimani, te “Kënga Magjike”, ku fituan çmimin “Supersonic”.
Ledina Çelo
Ledina Çelo i ka munguar prej vitesh skenës dhe prezencën e saj të fundit para publikut shqiptar kujtojmë që ishte si moderatore në Festivalin e Këngës të RTSH-së. “Do të heq dorë nga muzika kur mos të marr frymë. Kam lindur me muzikën, babai ka qenë këngëtar, ne dëgjonim gjithmonë muzikë klasike. Do t’i kthehem shumë shpjet skenës, pasi është shtëpia ime e dytë”, tha Ledina Çelo gjatë një intreviste për emisionin “Lart e Poshtë”. Kënga e saj e fundit është “Gaboja”, e publikuar në 2013-n.
