Këngëtarja shqiptare, Bleona Qereti ka rrëfyer për herë të parë për “Daily Mail”, arsyen përse vendosi të dalë “topless” në festën e Vanity Fair gjatë çmimeve “Oscar”.
Ajo tha se pamja e saj provokuese u keqinterpretua nga mediat botërore dhe se të qenit lakuriq në sytë e publikut ka të bëjë me artin dhe jo me vëmendjen.
Daily Mail shkruan sot se këngëtarja 38-vjeçare shqiptare tronditi të pranishmit në mars, kur u shfaq me një fustan rrjetë që i tregonte gjoksin.
Bleona u shpreh se veshja e saj ishte një lloj përshëndetje për meshkujt që përpiqen t’u thonë femrave çfarë të veshin.
Duke folur ekskluzivisht për “Femail”, këngëtarja, e cila u zhvendos në Los Anxheles nga Shqipëria gati dhjetë vjet më parë, thotë se ajo që zgjedh të zhveshë është krejtësisht vendimi i saj dhe se i pëlqen të qenit kreative me veshjet e saj.
Këngëtarja shqiptare tha se standardet e dyfishta vlejnë edhe te gjinia femërore, pasi Beyonce e Kim Kardashian nuk kritikohen edhe pse zhveshen njësoj si ajo.
“Nëse Kim K ose Beyonce kanë bërë të njëjtën gjë si unë, thonë ‘kanë thyer internetin’. Duhej të ishte ‘o zot sa mirë duken’ – Kim K e bën këtë thuajse çdo ditë. Gjithsesi, kur nuk të njohin, kjo përkthehet sikur kërkon vëmendje”, ka shtuar më tej ajo.
Pavarësisht guximit që pati, Bleona thotë se ishte nervoze sepse nuk e dinte si do të ishte reagimi i njerëzve.
