Grupi i njohur amerikan i rrokut, Bon Jovi, do të performojë në Tiranë më datën 14 mars.
Data e koncertit është parashikuar 14 Marsi, Dita e Verës, ndërsa pritet të nisë në orën 20:00.
Vendi është shumë domethënës sepse koncerti do të zhvillohet në stadiumin “Qemal Stafa”, një ditë para rikonstruktimit të tij. Kujtimet e të gjithë atyre që kanë qenë në stadiumin “Qemal Stafa” do të finalizohen me një koncert rroku.
Në ngjarjen e krijuar në internet shkruhet: “Siç e do tradita artistët më të mirë vijnë në Shqipëri për të festuar Ditën e Verës. Këtë vit, Bashkia Tiranë në bashkëpunim me G.A Tirana Events, sjellin bandën e famshme Bon Jovi në Stadiumin “Qemal Stafa”. Le të jetë kjo natë pra një festë muzike, si dhe një kujtim i bukur”.
Çmimi i biletave është parashikuar të bëhet i ditur më 29 shkurt, ndërkohë që pritet edhe konfirmimi i eventit.
