Teksa në të gjithë botën diskutohet për rëndësinë e të drejtave të kafshëve dhe në vende të shumta edhe keqtrajtimi më i vogël ndaj tyre dënohet me ligj, në Shqipëri ekziston një realitet tërësisht i ndryshëm. Ndonëse shteti shqiptar synon prej vitesh anëtarësimin në Bashkimin Europian, qëndrimi i institucioneve tona ndaj kafshëve të rrugës na lidh ngushtësisht me vendet e botës së tretë, ku dhuna ndaj tyre është diçka e mirëqenë.
Katër vite më parë, me protestën e shoqërisë civile për mbrojtjen e kafshëve endacake, u duk se kryebashkiaku Erion Veliaj ndryshoi qëndrimin e mbajtur deri më atëherë, kur vrasja e qenve endacakë ishte diçka e ligjëruar. Por duket se ky problem vijon ende të jetë i hapur, pavarësisht se Veliaj asokohe firmosi publikisht peticionin për mbrojtjen e tyre. Sipas organizatës për mbrojtjen e të drejtave të kafshëve “Animal Rescue Albania”, ekziston një dokument që dëshmon se në vitin 2017, Bashkia e Tiranës dhe Agjencia për Mbrojtjen e Konsumatorit kanë nënshkruar një marrëveshje për blerjen e medikamenteve që përdoren për vrasjen e qenve endacakë.
Sipas “ARSA Albania”, ky dokument shpjegon dhe zhdukjen e papritur të qenve nga rrugët e Tiranës, pasi bazuar në sasinë e medikamentit të blerë, ai mund të përdoret për të vrarë deri në 2300 qen, çka përktheet në një masakërtë vërtetë që mban vulën e Bashkisë së Tiranës.
Në kuadër të kësaj situate, shoqëria civile ditën e sotme ka ndërmarrë një tjetër protestë në të cilën ka akuzuar kryetarin e Bashkisë së Tiranës Erion Veliaj, për masakrën që po u bëhet qenve të rrugës. Nën sloganin #ERIONMJAFT me dhjetra qytetarë të shoqëruar edhe nga miqtë e tyre me katër putra i kanë kërkuar kryetarit të Bashkisë të ndalë këtë shfarosje të pamëshirshme ndaj qenve të rrugës, duke theksuar se për ta, gjatë gjithë këtyre viteve, është kujdesur komuniteti dhe jo Bashkia.
