Një ngjarje tragjike ka ndodhur mbrëmjen e së martës në Pakistan. Këngëtarja 28-vjeçare, Samira Sindhu, e cila ishte 8-muajshe shtatzënë është qëlluar për vdekje me tri plumba ndërsa po performonte në skenë.
Sipas raportimeve të BBC, rrethanat e vrasjes janë ende të paqarta, por pretendohet se gjatë një feste familjare në të cilën ishte e ftuar të këndonte, një burrë i ka qëlluar me armë pasi ajo nuk ishte ngritur në këmbë gjatë kohës që performonte.
“Saimira refuzoi të kërcente sepse ishte shtatzënë. Refuzimi i saj e inatosi vrasësin”, është shprehur bashkëshorti i këngëtares, Aashiq Ali, i cili ishte i pranishëm në momentin e vrasjes.
Vrasësi Tariq Jatoi është arrestuar nga policia dhe tha për gazetarët jashtë sallës së gjyqit se e gjithë ngjarja ishte aksidentale.
Në rrjetet sociale po qarkullon edhe një video ku shihet momenti që këngëtarja qëllohet. Ajo ishte duke kënduar, ndërsa 3 burra i afrohen dhe i hedhin para. Pasi ata largohen dëgjohen tri të shtëna dhe këngëtarja rrëzohet përtokë.
Pas kësaj ngjarje tragjike, muzikantë të shumtë u mblodhën në një protestë ditën e mërkurë, duke kërkuar dënimin maksimal të personit që qëlloi, por edhe të dy personave të tjerë të cilët dyshohen se mund të kenë qenë bashkëpunëtorë në krimin makabër.
