Fëmijët e vegjël të nxitur nga kurioziteti që i karakterizon duan të prekin gjithçka që i rrethon. Loja e tyre e preferuar është të hapin sirtarët e mobilieve që kemi në shtëpi dhe të hedhin gjithçka përtokë. Një lojë kjo që ka rezultuar shumë e rrezikshme për ta.
Një fëmijë ka shpëtuar mrekullisht pasi rrezikoi ta zinte poshtë një prej mobilieve të shtëpisë. Në videon-n e shpërndarë në internet shihet se si një fëmijë i mitur hap sirtarët e një komodine dhe papritur ajo rrëzohet përtokë.
Vogëlushi goditet nga komodina, por fatmirësisht arrin të largohet dhe ajo nuk e zë poshtë. Kjo skenë e frikshme është filmuar nga kamera e sigurisë së shtëpisë, ndërsa nëna e tij sapo dëgjon zhurmat dhe të qarat vrapon drejt dhomës ku ishin fëmijët.
Kjo ngjarje e rëndë ka ndodhur në qytetin Udon Thani në Tajlandë dhe është shpërndarë me shpejtësi në internet për të paralajmëruar të gjithë prindërit që të kenë kujdes me këto mobilie në shtëpitë e tyre, pasi rezultati mund të jetë fatal.
