Këngëtari shqiptar, Ermal Meta po na bën krenar çdo ditë e më shumë. Ai ka rrëmbyer zemrat e të gjithëve me këngën e tij “Non mi avete fatto niente”, e cila do të përfaqësojë Italinë në “Eurovizion” së bashku me Fabrizio Moro.
Ermali ka pasur një ngritje në karrierë vitet e fundit me një mori suksesesh.
“Për talentin e jashtëzakonshëm dhe suksesin e merituar”, sipas mediave italiane kryebashkiaku Antonio Decaro i qytetit të Barit do të nderojë nesër Ermal Metën.
Në Sanremo 2017, këngëtari shqiptar u rendit i treti, më pas e kemi parë në pozicionin e anëtarit të jurisë në “Amici”, çmimin “Best Italian Act” në MTV EMA dhe kulmi i suksesit të tij arriti në edicionin e 68-të të Sanremos, ku së bashku me Fabrizio Moro-n rrëmbeu çmimin e parë.
“Ishte viti 1996 dhe isha 13 vjeç. Arrita në një qytet që nuk e njihja, takoja njerëz që nuk i kisha parë kurrë dhe dëgjoja një gjuhë që nuk dija ta flisja. Gjithmonë vështrimin e mbaja tek këmbët e mia kur ecja. ‘Mos e humb toruan Ermal’, i thosha vetes, shihja këmbët dhe isha i kujdesshëm ku i hidhja hapat.
Mësova një gjuhë që nuk e njihja dhe gradualisht këto fytyra të huaja u bënë miqësore për mua. Qoshet e qytetit m’u bënë përherë e më familjare. Flisja pak, por ndjeja shumë. Ecja duke parë rrugën time sikur qielli të ishte reflektuar në asfalt dhe vazhdimisht pyesja veten: ‘Çfarë do të bëhet me mua?’
Pastaj hapat e mi një ditë u ndalën në dërrasat e drurit dhe ngrita vështrimin. Isha në një skenë dhe kjo ishte e vetmja gjë që dëshiroja, ky ishte i vetmi vend ku dëshiroja të qëndroja, ky ishte i vetmi vend ku dëshiroja të isha. E dija çfarë do të më ndodhte që nga ajo kohë ndaj nisa të fluturoja lart. Pas gjithë këtyre viteve, qyteti i Barit më jep çelësat e tij dhe ndihem i nderuar dhe mirënjohës për t’i marrë ato. Nuk hapin dyer, ama kujtimet e mia më të ngrohta dhe më të thella. Faleminderit shumë”, shkruan Ermali në postimin e tij në “Facebook”.
