Një aksident i rëndë automobilistik ka ndodhur mëngjesin e sotëm, në fshatin Vërzhezhë të Skraparit.
Një fugon, i cili transportonte nxënësit për në shkollë ka dalë nga rruga. Mësohet se në fugon ishin 15 fëmijë, 10 prej të cilëve kanë ngelur të plagosur. Nxënësit janë të grupmoshës 14-18 vjeç dhe po shkonin në shkollën e tyre në Çorovodë.
Sipas “Panorama” një vajzë me inicialet R.K mësohet të jetë në gjendje të rëndë ndaj është dërguar në Spitalin e Traumës në Tiranë ku do të marrë ndihmën mjekësore të specializuar.
Të plagosurit e tjerë me inicialet E.K, 17 vjeçe, A.K, 17 vjeçe, R.H 17 vjeç dhe B.H 17 vjeç janë dërguar në spitalin Rajonal të Beratit, ndërsa 5 të tjerë janë dërguar në spitalin e Skraparit.
Sipas policisë, mësohet se minibusi me targa AA445AH ka dalë nga rruga si pasojë e rrëshqitjes, ndërsa ende po vijojnë hetimet për zbardhjen e ngjarjes.
