Prej 11 ditësh është shpallur e humbur aktorja me origjinë shqiptare, e cila është bërë e njohur me filmin “All or nothing”, Adea Shabani.
25-vjeçarja ishte vendosur në Los Angeles prej 2 vjetësh duke punuar për të ndjekur ëndrrën hollivudiane. Ajo studionte në Los Angeles për aktrim dhe miqtë e saj filluan të shqetësoheshin kur ajo nuk kishte shkuar më në mësim.
Adea është parë për herë të fundit më 23 shkurt, disa blloqe larg Teatrit të famshëm Kinez në mes të Hollywood-it, shumë pranë vendit ku ajo banonte.
Që prej asaj dite familja dhe miqtë e saj kanë humbur kontaktin me Adean dhe janë vënë në kërkim të saj. Familja ka punësuar edhe një dedektiv privat për të gjetur vajzën e tyre, por ditët po kalojnë dhe ende nuk ka asnjë gjurmë.
Autoritet amerikane kanë vënë në dispozicion një shumë prej 25 mijë dollarësh për këdo që do të jap ndonjë detaj rreth saj.
Sipas miqve të Adeas, ditët e fundit diçka nuk shkonte me të pasi nuk iu përgjigjej mesazheve dhe telefonatave. Një veprim ky që binte në kundërshtim me sjelljet e zakonshme të aktores shqiptare. Familja është shumë e shqetësuar dhe tashmë i luten Zotit që ta gjejnë gjallë.
