Olesia Duka, ish-bashkëshortja e këngëtarit Bojken Lako, tre ditë më parë u vu në pranga nga policia e Durrësit për akuzën e mashtrimit. Stomatologia e njohur akuzohet se nëpërmjet skemës së mashtrimit ka përvetësuar shumën e 900 mijë eurove nga biznesmeni Idlir Hoxha.
Ditën e sotme 38-vjeçarja ka dalë para trupit gjykues ku ka folur për herë të parë rreth kësaj çështjeje. Sipas saj akuzat nuk janë të vërteta dhe madje ajo është gjobitur nga biznesmeni Hoxha dhe vëllai i tij.
“Më lini kohë të paraqes provat e mia, pasi e gjithë kjo më ka shkatërruar karrierën dhe imazhin. Çdo detyrim e kam bërë me bankë, e jo me çantë. Idlir Hoxha dhe i vëllai më kanë vënë gjobë.
Më kanë bërë presion në qershor 2017, pasi bëra një festë për fëmijët në bashkëpunim me Vangjush Dakon. Të zbardhet e gjithë historia ime dhe pse unë i mora lekët”, deklaroi në gjykatë Olesia Duka.
Sipas Prokurorisë kallëzuesi i Olesias është pronari i një pike këmbimi valutor dhe i një agjencie udhëtimi. Ai është njohur me Olesian në nëntor 2016 dhe fillimisht ajo i ka kërkuar një shumë të vogël parash për pajisje dentare.
Herën e parë ajo është treguar shumë korrekte duke ia kthyer shumën e marrë hua, po ajo ka vijuar t’i kërkojë më tej para biznesmenit, duke mos ia kthyer më dhe duke kërkuar vazhdimisht që të shtynte afatin e kthimit të tyre.
