“Pa kupton tatimor, ke të drejtën të mos paguash” apo “Mos harroni kuptonin tatimor”, janë dy nga sloganet që mban të varur në mur çdo biznes në vendin tonë. Po sikur t’ju themi që duart tuaja nuk duhet të kenë kontakt me këtë letër?
Studimet e fundit kanë ngritur alarmin se duhet treguar shumë kujdes me kuponët tatimorë, pasi më shumë se 90% e tyre përmbajnë kimikate, të cilat janë konsideruar shkaktare të autizmit, diabetit, kancerit dhe një sërë sëmundjesh të tjera.
Kuponët përmbajnë substanca kimike si, Bisphenol A (BPA) dhe Bisphenol S (BPS), të cilët reagojnë me receptorët e hormoneve të estrogjenit dhe tiroides. Ky kontakt i rrezikshëm bëhet shkak për, infertilitetin, autizmin, obezitetin, lindjet e parakohshme dhe fillimin e hershëm të pubertetit.
BPA dhe BPS i shtohen faturave për ta bërë shkrimin më të errët pa qenë nevoja të përdoret bojë, madje gjenden edhe në shishet plastike të produkteve për bebe. Administrata Amerikane e Ushqimit e ka ndaluar rreptësishtë që BPA-ja të përdoret në produktet për bebe, ndërsa Komisioni Europian do të ndalojë që kimikati të shtohet tek faturat pas vitit 2020.
Normalisht që nuk ju këshillojmë të mos e merrni kuponin, por derisa Komisioni Europian të marrë masa, mundohuni ta prekni me një qese ose letër dhe shmangni kontaktin me produktet ushqimore.
Në fund, sigurohuni të lani duart mirë.
