Ish-deputetja e PD-së, Majlinda Bregu, nuk ka pasur asnjë detyrë tjetër publike, pasi përfundoi atë në krye të Këshillit Kombëtar të Integrimit Evropian.
Ditën e sotme u përfol se, Bregu është propozuar si kandidatura e Shqipërisë për Presidente e RCC në Sarajevë. “Regional Cooperation Council”, është një organizatë që merret me projektet ekonomike rajonale, nën mbikëqyrjen e BE.
Nëpërmjet një postimi në Facebook, ajo sqaroi se kishte aplikuar në këtë pozicion dhe se është në pritje të një përgjigjeje.
“Po lexoj një lajm që paska marrë dhenë për aplikimin tim për pozicionin e Sekretarit të Përgjithshëm, të Këshillit të Bashkëpunimit Rajonal. E para: PO! Kam aplikuar me emrin tim për këtë pozicion. I cili është i pari i këtij niveli që nëse do ta fitoj, i jepet një shqiptari. E dyta! Nuk është pozicion që varet nga qeveria shqiptare dhe për rrjedhojë nuk mund të ofrohet nga qeveria shqiptare. Nota duhet të përcillet zyrtarisht nga Ministria e Jashtme, siç ndodh me çdo konditat nga vendet e tjera, që kanë aplikuar. Zgjedhja e Sekretarit të Përgjithshëm është një proces i gjatë përzgjedhje, votimesh në disa nivele nga të gjitha vendet e Evropës Juglindore dhe ku Komisioni Europian është partneri i tij kryesor. Sigurisht që nuk i kushton asnjë lek taksapaguesve shqiptarë. E fundit! Nëse do ta fitoj këtë pozicion, do të jetë një nder për mua, Shqipërinë dhe shqiptarët kudo në rajon”, sqaroi Bregu.
Ish-deputetja e PD-së, Majlinda Bregu, ka qenë eksponenti i parë i opozitës, që bashkoi qëndrimet në Bruksel me Ramën. Bregu u la jashtë listave të PD-së në zgjedhjet parlamentare nga Basha.
Burimi: Facebook
