Gazetari Spartak Koka ishte i ftuar dje në emisionin “Rudina” nga ku zbuloi një pjesë të dëshmisë së motrës së Arielës. Ai tha se ajo ishte në gjendje shoku dhe vazhdimisht përsëriste para policisë gjyqësore fjalët: “Ma vrau motrën para syve”.
“Ma vrau ai plehra, ma vrau në sytë e mi. Ne nuk e dinim që ai kishte ardhur në Tiranë dhe s’na e thanë as ata të shtëpisë. Ai e kishte kërcënuar që ti nuk merr njeri tjetër përveç meje, e kapi menjëherë dhe e qëlloi. Nuk kemi bërë ndonjëherë ankesë në polici”, u shpreh motra e Arielës gjatë deklaratës së saj në polici.
Gazetari Koka tha se Ariela ishte kërcënuar vazhdimisht nga Aldisoni dhe tregohej e kujdesshme ndaj veprimeve të tij.
“Ata ishin të papërgatitur pasi zakonisht ruheshin. Për kërcënimet ishte vënë në djeni edhe familja e vajzës dhe e djalit. Fakti që kërcënimi nuk ishte marrë seriozisht çoi në këtë ngjarje. Mbajtja e konfliktit brenda fshatit apo brenda rrethit familjar tek të dy palët sjellë këtë pasojë”, tha Spartak Koka.
