Sokol Balla ka vendosur t’i zyrtarizojë thashethemet e fundit në media që flasin për largimin e tij nga Top Channel.
Me një postim në Twitter, gazetari i njohur i ka dhënë lamtumirën 2017-ës dhe njëkohësisht dhe Top Medias.
“Në këtë fund 2017 dua të uroj së pari kolegët e mi të Top Channel, me të cilët kalova më shumë se 12 vjet të paharruar, dhe me të cilët rruga ime sot ndahet!”, shkruan Balla.
Ndërsa dje, ka ardhur edhe reagimi i pronares së Top Medias, Vjollca Hoxha, e cila në një prononcim për web-in e Top Channel ka folur mbi largimi e Sokol Ballës.
“Natyrisht që ikja e Sokol Ballës është një goditje, por nuk është fundi. Ka plot të tjerë në tregun mediatik që mbushin boshllëkun e krijuar, bile edhe mund të jenë më të mirë. Kjo nuk do të thotë se Sokol Balla nuk është gazetar VIP dhe me një zgjuarsi e nuhatje te lindur për gazetar. Por nuk u shemb Roma se iku Koli!”, shkruhet në site-in e Top Channel.
