Ka mbërritur sot rreth orës 12:00 trupi i pajetë i të riut shkodran, i cili humbi jetën në Francë pasi u dhunua në paraburgim.
Kortezhi i makinave u nis nga aeroporti “Nënë Tereza” në drejtim të Shkodrës ku do t’i jepet dhe lamtumira.
Trupi i pajetë i të riut i cili doli nga morgu i Marsejës një ditë më parë i mbuluar me flamurin kuq e zi dhe i shoqëruar nga përfaqësues të familjes, mes të cilëve edhe i ati i cili qëndronte prej ditësh në Francë.
Burimet thonë se trupi i pajetë pritet t’i nënshtrohet edhe një ekspertize mjekoligjore në Shqipëri në funksion të zbardhjes së shkaqeve të vdekjes.
Ai do të përcillet drejt banesës së fundit në Shkodër, ku familja Beqiraj ka hapur dyert e mortit prej ditës që mësoi vdekjen e të birit.
Të gjitha shpenzimet janë marrë përsipër nga qeveria shqiptare, që siç bëri të ditur ministri i Jashtëm Ditmir Bushati gjatë vizitës në familjen Beqiraj po bashkëpunon ngushtë me autoritetet franceze për të zbardhur të vërtetën e ngjarjes.
Vdekja në rrethana ende të mistershme, që po hetohet nga autoritetet franceze, ngjalli reagime të forta dhe protesta. Disa shqiptarë madje dogjën flamurin francez në shenjë rebelimi ndaj vdekjes së papritur të të riut, të cilit iu hoqën aparaturat pa lejen e prindërve, ndërkohë që kishte rënë në koma.
