Shoqëria shqiptare pavarësisht zhvillimeve dhe ndryshimeve që ka pasur në dekadat e fundit, përsëri karakterizohet nga një varfëri e skajshme për shtresa të caktuar të popullsisë. “Luli i vocërr” i Migjenit është i pranishëm edhe sot. Njerëz që nuk kanë një kafshatë buke për të ngrënë, një çati ku të fusin kokën apo kushtet më minimale të jetesës, për të mos folur për arsimimin dhe edukimin e tyre.
Në këto ditë festash atmosfera është bërë më emocionale, më e prekshme dhe zemra e shumkujt është hapur për t’iu ardhur në ndihmë këtyre familjeve, të cilat mbase nuk do t’i festojnë fare këto festa, apo do i festojnë në mënyrën e tyre: “Me pjatat bosh dhe zemrën plot”.
Njerëz dhuroni me sa mundësi që keni sidomos në këto ditë festash. Ju do të ndjeheni më mirë, më falenderues ndaj asaj që keni, më pak të stresuar, më optimist dhe me një zemër të madhe. Po kush janë disa nga të famshmit shqiptarë që e kanë hapur zemrën e tyre në këto ditë festash?
Zonja Monika Kryemadhi vetëm pak ditë më parë dhuroi një shumë prej 1000 eurosh për shtëpinë e foshnjës në Sauk. Çizmet e famshme me të cilat Monika qëlloi kryeministrin, i ka shitur për jo pak , por 1000 euro, 10 fishin e asaj që i ka blerë. Shumën e fituar e ka dhënë për fëmijët jetimë 0-6 vjeç në qendrën e Saukut për t’iu zbukuruar sado pak këto ditë festash.
Princ Leka dhe Princeshë Elia janë bërë pjesë e një akti bamirësie në qytetin e Burrelit. Fondacioni Mbretëresha Geraldinë së bashku me Fundjavë Ndryshe vizituan dhe ndihmuan disa familje në fshatin Derjan dhe Zenisht.
Pedagogia e Universitetit të Arteve Riselda Sejdija fundjavën e kaluar i është bashkuar nismës “Bamirësia nuk të varfëron” dhe kanë dhuruar dhurata për fëmijët në nevojë në qytetin e Tiranës.
Biznesmeni Saimir Mane është një ndër personat më të ndjeshëm përsa i takon bamirsisë. Ai është mjaft aktiv duke ndihmuar njerëzit në nevojë dhe në 14 dhjetori nënëshkroi edhe një kontratë me nismën “Fundjavë Ndryshe”. Kjo marrëveshje synon që të ndihmojë familjet në nevojë në përmirësimin e kushteve të jetesës, dhe në kthimin e vlerave dhe rëndësisë që ka një jetë aktive për këtë kategori të shoqërisë shqiptare për familje të cilat do të jenë të identifikuara dhe referuara nga “Fundjavë Ndryshe”.
Arbana Osmani publikoi pak ditë më parë spotin e emisionit të saj të ri “Dua të të bëj të lumtur” ku shihet moderatorja teksa iu shpërndan dhurata fëmijëve në mes të dëborës në Vermosh. Arbana ka vendosur të paralajmëroj fillimin e emisionit të saj me një akt bamirësie meqënëse jemi edhe në një periudhë festash.
Burimi: Iconstyle.al
