Glassdoor, një prej faqeve online më të famshme në të cilën çdo punonjës aktual i një kompanie apo qoftë edhe një punonjës i mëparshëm mund të publikojnë në mënyrë anonime përshtypjet që ata kanë mbi kompaninë në të cilën punojnë apo kanë punuar, publikoi botimin e përvitshëm (që sivjet është në vitin e dhjetë të tij), “Kompanitë më të mira për të punuar në 2018”.
Gjatë këtyre dhjetë viteve që Glassadoor është marrë me këtë klasifikim, kompanitë Apple, Bain & Company dhe Google nuk janë renditur kurrë poshtë dhjetë kompanive më të mira.
100 kompanitë më të mira ishin pjesë e gjashtë industrive kryesore të mëposhtme: teknologjia me 28 kompani në këtë listë, tregtia me pakicë me 11 kompani, shëndetësia me 11 kompani, firmat e konsulencës me 6 kompani, financa me 6 kompani dhe turizmi po me 6. Ndërsa 5 shtetet më të mira për të punuar, në të cilat ndodhen këto kompani janë përkatësisht: Bay Area-San Francisko, Boston, Los Anxhelos, Nju Jorku dhe Seattle.
Më poshtë do të njiheni me renditjen e 10 prej kompanive më të mira për të punuar në 2018 (renditje kjo e cila është bërë duke u bazuar në opinionet e punonjësve):
1.Facebook
Zyrat: Parku Menlo, Kaliforni
Pse punonjësit e adhurojnë punën në këtë kompani: “Unë nuk mund ta imagjinoj veten jashtë kësaj kompanie”. Ju keni kënaqësinë të punoni me njerëz të zgjuar, me energji dhe më e rëndësishmja ku gjithkush beson në punën që bën. Për çdo detyrë të realizuar me sukses ju jo vetëm që vlerësoheni, por edhe shpërbleheni financiarisht.
2.Bain & Company
Zyrat: Boston
Pse punonjësit e adhurojnë punën në këtë kompani: “Punonjësit, kolegët e mi, janë arsyeja kryesore se pse unë dua të punoj në Bain & Company. Çdo ditë mua më pëlqen gjithnjë e më tepër të punoj me ta, duke u frymëzuar dhe njëkohësisht duke u rritur profesionalisht.
3.Boston Consulting Group
Zyrat: Boston
Pse punonjësit e adhurojnë punën në këtë kompani: “Potenciali i lartë i rritjes profesionale, trajnime të shumta, kolegë shumë të zgjuar dhe kreativë, ushqim dhe pije falas”.
4.In-N-Out Burger
Zyrat: Los Anxhelos
Pse punonjësit e adhurojnë punën në këtë kompani: Fleksibilitet në caktimin e orareve në të cilat ju mund të punoni dhe mbi të gjitha mundësi për të zgjedhur kolegët me të cilët ndihesh më mirë për të punuar. Vlerësime dhe shpërblime në 9 nga 10 herë të mundshme. Ushqim dhe pije falas, pagë shumë e lartë dhe mbi të gjitha, shpërblime të majme për orët jashtë orarit.
5.Google
Zyrat: Mountain View, Kaliforni
Pse punonjësit e adhurojnë punën në këtë kompani: Kolegë jashtëzakonisht inteligjentë dhe të aftë, disa prej produkteve më të mira në treg, menaxhim shumë i mirë profesional, përfitime të mahnitshme (sigurimi i jetës për punonjësit dhe familjarët e tyre falas, ushqim dhe pije falas dhe ulje për çdo produkt që punonjësit duan të blenë), dhe mundësi për të udhëtuar falas në vende të ndryshme.
6.Lululemon
Zyrat: Vankuver
Pse punonjësit e adhurojnë punën në këtë kompani: Kolegët janë ndër më të mirët që mund të kërkonim. Zhvillim i vazhdueshëm profesional në sajë të trajnimeve të vazhdueshme.
7.HubSpot
Zyrat: Kembrixh, Masaçusets
Pse punonjësit e adhurojnë punën në këtë kompani: Në këtë kompani ekziston një kulturë ku pavarësisht rolit tuaj, nëse keni diçka për të thënë, zëri juaj do të dëgjohet gjithmonë. Njerëzit që punojnë këtu janë shumë zgjuar, punëtorë dhe miqësorë me njëri-tjetrin.
8.World Wide Technology
Zyrat: Maryland Heights
Pse punonjësit e adhurojnë punën në këtë kompani: As nuk mund ta imagjinoj se mund të ketë ndonjë kompani e cila të inkurajojë zhvillimin profesional më shumë se World Wide Technology. Trajnimet profesionale në shtete të ndryshme të botës janë të shumta dhe mbi të gjitha ekipi ekzekutiv është në dispozicion të të gjithë punonjësve që kanë nevojë për ndihmë.
9.Spitali i fëmijëve St. Jude
Zyrat: Memfis
Pse punonjësit e adhurojnë punën në këtë kompani: Stafi i punonjësve këtu është fantastik dhe mikpritës, këtu askush nuk ndihet sikur është në punë por sikur të gjithë janë në një familje të madhe. Të gjithë janë bashkëpunues dhe miqësorë me njëri-tjetrin.
10.Ultimate Software
Zyrat: Weston
Pse punonjësit e adhurojnë punën në këtë kompani: Kultura e punës dhe vlerat janë me të vërtetë themelet e kësaj kompanie. Vlerësimi për individin është gjithashtu baza e funksionimit të kësaj kompanie dhe kjo vjen që nga nivelet ekzekutive e deri tek punonjësit ndaj njëri-tjetrit. Këtu nuk ka paragjykime ndaj askujt. Femrat konsiderohen si një prej forcave më të mëdha dhe të fuqishme dhe minoritet jo vetëm që nuk paragjykohen por në të shumtën e rasteve mbivlerësohen. Puna me vështirësi më të madhe është edhe ajo më e paguara.
Burimi: Monitor
