Marsela Çibukaj ishte e ftuar në emisionin “Pop Culture” në Top Channel ku foli ndër të tjera edhe për sherrin virtual me Samanta Karavellën. Gjithçka nisi pasi ajo postoi në llogarinë e saj në internet një mendim për këngëtaret shqiptare.
Ajo shkroi një status të gjatë për të gjitha artistet që, më shumë se te zëri dhe muzika e mirë, fokusohen te pamja, ekspozimi dhe, shpeshherë, edhe te zhveshja.
I menjëhershëm ishte reagimi i Samantës kundrejt Marselës, dhe madje edhe pak i ashpër.
Marsela e ka sqaruar edhe një herë sherrin e saj me Samantën në “Pop Culture” duke thënë ajo nuk e kishte pasur aspak personale me të.
“Unë dëgjoj dhe jap përshtypjen time për këngët, flas për muzikën, në Facebook-un tim jam e lirë të shpreh mendimin tim, pa ofenduar askënd. Unë nuk e kisha me Samantën. Samanta u kthye, sepse i dogji vetë”: ka thënë këngëtarja simpatike duke theksuar se vitet e fundit ka vënë re dendur ritmin reggae, i cili sipas saj nuk iu shkon të gjithëve.
Marsela tha ndër të tjera si i vjen shumë keq sidomos për shprehjen: “Ku ishe ti kur mua më gjykonin mjeshtrit e mëdhenj të muzikës”.
“Unë mendoj se nuk duhet të gjykojmë në këtë mënyrë, sepse nuk jemi këtu për të thënë ku ishe ti…Unë dua që të jetë 100 për qind live dhe jam pak gjykuese ndaj ekspozimit të tepërt dhe ky manipulimi i gjinisë femërore më duket i tepërt. Unë jam pak më tej. Do të doja të mos kishim nevojë me ekspozime…” tha Marsela ndër të tjera.
Pyetjes nëse pas atij reagimi a janë sqaruar gjërat me Samantën, Marsela tha se po.
“Me Samantën jemi sqaruar. Jemi takuar në një event privat dhe Samanta u afrua vetë… Mendoj se jemi shumë të shpejtuar të gjithë, por mendoj se edhe njerëzit nga shtëpitë, disa gjëra që fliten online i marrin jetësore.”
