Albert Dumani, drejtori i programacionit në TV Klan ishte i ftuar në emisionin “Rudina”, kësaj radhe jo për të folur vetëm për serialet turke që transmetohen në këtë televizion, por edhe për jetën e tij private.
Stafi i “Rudina”-s kishin kërkuar mbi jetën e tij dhe arritën ta emociononin me surprizat që i kishin rezervuar.
“Kjo ishte surprizë për mua”, i tha Berti Rudinës kur moderatorja i tregoi se kësaj radhe ai do të fliste më shumë për jetën e tij private.
Përveç pasioneve jashtë ekranit, Berti rrëfeu edhe për fëmijërinë e tij të vështirë, për të cilën asnjëherë më parë nuk kishte folur në publik.
Sapo pa një foto kur ishte ende fëmijë, ku kishte dalë me të ëmën, Berti u përlot. Aty, me shpinë, nga larg, duket i ati. Ai është ndarë nga jeta kur Berti ishte vetëm 5 vjeç e gjysmë. Berti tregon se nuk ka qenë një fëmijëri e lehtë. Dy prindërit e tij nuk ishin martuar kurrë.
Familjet, në atë kohë nuk lejonin martesat e feve të ndryshme, ndaj kjo ishte arsyeja pse kjo martesë nuk u bekua nga ata. Vetëm pas ardhjes së tij në jetë, familjet u bashkuan, por shumë pak vite pas lindjes së Bertit, për fat të keq, i ati u sëmur rëndë.
“Mami nuk u martua kurrë me babain, ata nuk bënë as dasmë. Mami ishte 25 vjeç dhe mbeti e vetme. Ky është një peng i madh për mua, që prindërit e mi nuk kanë bërë kurrë dasmë…”, tha Berti.
Sëmundja e të atit ishte ajo që më shumë se gjithçka e bëri Bertin të emocionohej.
“Mbaj mend që flija anash me mamin. Ai ishte me kancer në pankreas…”, tregoi ai me lot në sy.
E ëma ishte vetëm 25 vjeç pas ndarjes nga jeta të bashkëshortit, por vendosi të mos martohej më kurrë. Edhe pse i ati i thoshte të vazhdonte jetën e saj, sepse djalin mund ta mbante ai, ajo nuk e la Bertin vetëm. Ndaj edhe sot, ata janë gjithmonë bashkë, të dy.
“Çdo njeri e thotë për nënën, por ajo është heroina ime, mbretëresha ime. Unë ia kam thënë gjithmonë këtë. Unë dua që ajo të mos qajë më kurrë. Më ka rritur me shumë sakrifica, me ato që kishim….” , tregoi Berti mes lotësh.
Rudina e ka emocionuar akoma më shumë Bertin kur i ka shfaqur në ekran një video-mesazh të nënës së tij, e cila i thotë se është shumë krenare për të.
“Një djalë si ty ia dëshiroj çdo nëne”, tha ajo ndër të tjera, por nuk la pa përmendur edhe një porosi që, me siguri, e kanë të gjitha nënat që i kanë djemtë në moshën e Bertit.
“Ti duhet të gjesh një vajzë të mirë që të ma biesh në shtëpi, pastaj le të vdes, se ndryshe nuk kam guxim të vdes…”, ishte dëshira e nënës e nënës së Bertit, e cila e bëri të shpërthente në lot.
