Delvinë
Në fshatin Vanë, rrëzohet ura e vetme që lidh zonën me qytetin. 350 familje kanë mbetur të bllokuara dhe nuk kanë asnjë mundësi komunikimi me rrugën nacionale.
Durrës
Situata është shumë e vështirë në zonën e Fushë-Krujës, ku nga dalja e lumit nga shtrati, janë përmbytur dhe janë bërë të pajetueshme me qindra banesa. Edhe në Katundin e Ri, pjesë e Bashkisë së Durrësit situata është shumë e rënduar. Me qindra ha tokë dhe banesa janë nën ujë.
Vlorë
Si pasojë e çarjes së argjinaturave të Vjosës ka përmbytje të mëdha. Në fshatrat Novoselë Qendër, Dëllenj, Delisuf, Ferras, Mifol, Bishan, Vitore uji është mbi 1 metër. Situata sa vjen e rëndohet nga prurjet e shumta. Energjia elektrike mungon prej 3 ditësh.
Devoll
Në Bashkinë Devoll ka dalë nga shtrati lumi Devoll. Për pasojë, është përmbytur nënstacioni elektrik dhe një pjesë e konsiderueshme e tokave bujqësore. Të mbjellat me grurë janë dëmtuar plotësisht. Janë përmbytur edhe lokalet anës rrugës nacionale.
Maliq
Në Bashkinë Maliq, Zëmblak, përmbytja ka ardhur nga mos-hapja e digës së lumit Devoll. Diga ose prita që shërben për të grumbulluar ujin për vaditje në verë ka qenë e dëmtuar dhe portat janë të mbyllura përgjysmë.
Bulqizë
Qafë Buall- Peshkopi kalohet me vështirësi, janë përmbytur një pjesë e bizneseve. Tek pazari i Bulqizës niveli i ujit arrin në 50 cm. Uji i ardhur nga galeritë e zonës D, ka shkaktuar kaos dhe përmbytje te bizneset.
Martanesh
Në Martanesh ka probleme nga shembja e skarpateve dhe rënia e gurëve në aksin Martanesh -Qafa e Buallit.
Në Shupenze, Gjoricë ka probleme me përmbytjen e dhjetëra hektarëve dhe me mungesën e energjisë elektrike.
Vorë
Zona e Prezës është nga më të prekurat. Janë rreth 110 familje të përmbytura plotësisht ose pjesërisht.
Ura Vajgurore dhe Berat
Ka patur përmbytje gjatë natës nga lumi Osum dhe nga bashkimi me Devollin ka përmbytje në fshatrat Arez, Ciflig, Kuç, Hingë, ku vazhdon lumi Seman.
Mallakastër
Raportohet i përmbytur stacioni i pompave në Poçem. Rrezikohet që Mallakastra të mos furnizohet me ujë. Gjithashtu edhe disa fshatra nuk kanë energji elektrike.
Gjirokastër
Gjirokastra ishte zona e parë e goditur nga reshjet në formë stuhie.Problemi më i madh atje është bllokimi i rrugëve nga përrenjtë malorë, të cilët kanë shkarkuar sasi shumë të mëdha inertesh në rrugë.
