Regjisori i njohur Leonard Bombaj u vu në qendër të mediave, para disa viteve, për shkak të akuzave për përdhunin ndaj një vajze të mitur. Aktorja e “Sireafilm”, Ajsi Xhaxhaj e akuzoi publikisht se ai kishte abuzuar seksualisht dhe psikologjikisht ndaj saj. Një histori “bombë” kjo që na la pa fjalë, duke menduar që Leonardi drejtonte një shkollë arti për fëmijë dhe kështu në mënyrë indirekte të shkonte mendja edhe tek fëmijët e tjerë. Por çfarë ndodhi, sa të vërteta ishin këto akuza?
Regjisori vendosi ta ndiqte juridikisht këtë çështje, megjithëse siç tregon ai iu desh të përballej me shumë intriga, të cilat ishin një skenar i mirëfilltë për një film “OSCAR”.
Vitet kanë kaluar, edhe kjo histori gjithashtu, po për familjen e Nardit kjo ishte një histroi që la gjurmë. Bashkëshortja e tij Esmeralda, aso kohe ishte shtatzënë dhe e përjetoi këtë situatë në mënyrë më të keqe të mundshme, por u tregua e fortë sepse siç thotë ajo dinte gjithçka rreth kësaj historie dhe ishte dëshmitare e pafajësisë së Leonardit. Kjo ngjarje nuk pati shans për të tronditur martesën dhe as marrëdhënien e tyre të konsoliduar tashmë.
Për herë të parë rreth kësaj ngjarje Esmeralda Blaceri ka folur dje në emisionin “Rudina”, duke treguar se kjo ngjarje përfundoi me shpalljen e bashkëshortit të saj të pafajshëm nga gjykata.
“Nuk kam folur asnjëherë më parë për këtë, sepse ka qenë shumë private dhe i fortë përjetimi. Sot them se në sjelljen me personin, unë nuk do kisha ndryshuar asgjë. Unë kam qenë shumë e përfshirë në histori, madje më shumë se ç’është folur. Ne thjeshtë kemi gabuar person dhe nuk e kemi vlerësuar mirësinë dhe dashamirësinë tonë, por nuk do kisha ndryshuar asgjë, thjesht vetëm personin. I gjithë përkushtimi i duhej dhënë një personi tjetër”, – thotë Esmeralda e prerë që gjithçka për të, ashtu si edhe për Leonardin, do të ishte njëlloj si më parë. Vetëm jo më tek i njëjti person.
Ndërsa Leonardi, me gjithë presionin e madh, ishte më praktik në veprime. Ia la të gjithë punën ligjit dhe në fund doli i fituar nga një njeri që, siç thotë ai, të gjithë historinë e sajoi për famë dhe për frikën se ajo do t’i ikte. Dhe nëse do të kthehej pas në kohë, edhe ai ka një merak: ndoshta mund të ishte treguar pak më vigjilent para se të tjerët të thurnin histori të paqena vetëm për famë.
