Tre vite më parë kur dy sportistë shqiptarë dolën pozitivë në testin e doping-ut, u shkruaj se peshëngritja pësoi një ‘tërmet’ të vërtetë.
Po sot kur një peshëngritësi i mohohet e drejta për të marrë pjesë në kompeticionin botëror, a mund të thuhet e njëjta gjë?
A mund të shkruajmë sot “tronditet peshëngritja shqiptare”, pasi sportistit më të mirë, Daniel Godelli iu mohua viza për në Shtetet e Bashkuara të Amerikës!
Lajmin e pazakontë vendosi ta jepte vetë kampioni i Europës përmes një postimi në “Facebook”. I revoltuar për mohimin që iu bë, Godelli shkroi se ndalimi i tij për të marrë pjesë në kompeticionin botëror të peshëngritjes që do të mbahet në Amerikë është një humbje të Federatën Shqiptare të Peshëngritjes dhe një turp për shtetin shqiptar.
“Iconstyle.al” kontaktoi me Godellin për të kuptuar më shumë rreth ngjarjes. I pyetur për arsyen e mohimit të vizës nga ana e Ambasadës amerikane, shtangisti kuqezi na tregoi letrën e marrë nga ky institucion si përgjigje të aplikimit të tij.
Si arsye të mohimit të vizës së përkohshme, Ambasada shkruan se është mungesa e garancisë që Godelli do të rikthehet në atdhe. Në letër radhitet arsyetimi kështu:
“Një kërkesë e përbashkët për shumicën e kategorive të vizave joemigruese është që aplikanti të tregojë se ai/ajo ka një vendbanim në një vend të huaj, të cilat ai/ajo nuk ka ndërmend që ta braktisë. Aplikantët zakonisht e përmbushin këtë kërkesë duke demonstruar se ata kanë lidhje të forta në shtetin ku banojnë, që tregojnë se ata do të kthehen në atë vend, pas një vizite të përkohshme në Shtetet e Bashkuara. Lidhjet të tilla përfshijnë lidhjet profesionale, të punës, të shkollës, lidhjet familjare apo lidhjet shoqërore në një vend të huaj. Ju nuk keni demonstruar se ju keni lidhje të cilat do t’ju detyrojnë që të ktheheni në vendin tuaj pas udhëtimit tuaj në Shtetet e Bashkuara”.
Vendimin e marrë Amasada e cilëson si përfundimtar dhe nuk lë hapësirë për apelim. Mundësia e vetme që ka Godelli është ajo e njëjta me çdo qytetar: mund të riaplikojë. Por me një kusht:
“Nëse zgjidhni për të riaplikuar, duhet të jeni të përgatitur për të ofruar informacionin që nuk u paraqit në aplikimin tuaj fillestar ose për të demonstruar se rrethanat tuaja kanë ndryshuar që nga aplikimi juaj i mëparshëm”.
Në këtë mënyrë vihet re fakti që, Ambasada nuk e ka marrë në konsideratë pjesëmarrjen e tij në “Kampionatin Botërorë të Peshëngritjes”. Këtu mund të përballemi me një paradoks!
Nga njëra anë kërkesa për vizë e Daniel Godelli është bërë pikërisht nga Federata Shqiptare e Peshëngritjes, që ai të marrë pjesë në kompeticionin që mbahet në Anaheim të SHBA-ve, nga data 28 nëntor deri më 5 dhjetor të këtij viti.
Nga ana tjetër në letrën zyrtare të Ambasadës shkruhet se nuk është marrë në konsideratë lidhja e tij profesionale si shtangist në Shqipëri dhe as kompeticioni.
Godelli shkroi se nuk e ka “tradhtuar” asnjëherë flamurin shqiptar, pavarësisht ofertave të shumta që ka marrë nga përtej kufijve:
“Kam pasur oferta nga shumë shtete të botës që kur isha fëmijë dhe kurrë se kam çuar në mendje që të mund të ndërroj flamurin tim. Politikan apo drejtues aktual të federatës sime flasin për flamur, ndërkohë nuk dinë sakrificën e një sportistit që vërtet lufton për flamur, e jo për monedha, që kurrë si kam kërkuar shtetit tim”.
“Iconstyle.al” pyeti sportistin nëse pati ndonjë reagim drejtuar tij nga federata pas këtij vendimi, Godelli u shpreh:
“Kjo federatë që thotë, “bëmë të pamundurën”?!”.
Pavarësisht vendimit, që në të njëjtën kohë ndaloi synimin e tij për të fituar çmimin e kampionit të botës dhe për të thyer rekordin botëror, Godelli është i vendosur për synimet e tij.
25-vjeçari e mbyll deklaratën për “Iconstyle.al”, me një shprehje që ndoshta do të prek shumë persona:
“Falënderoj atë ose ato njerëz që bënë këtë lojë, thjesht më shtuan dozën e inatit, asgjë tjetër. Nuk hahen minjtë me luanin”.
Për ne kjo ngjarje është po aq “tronditëse për peshëngritjen shqiptare”, sa edhe ajo e ndodhur në 2014-n.
25-vjeçari Daniel Godelli ka një histori të gjatë suksesi në fushën e peshëngritjes. Kujtojmë se vetëm më 5 prill të këtij viti ai arriti të fitonte medaljen e artë në stilin e shkëputjes në peshën 77 kg në Kampionatin Europian të Peshëngritjes, që u zhvillua në Split të Kroacisë.
