Emisioni “Stop” i kësaj të hëne ka nisur ndryshëm nga herët e tjera. Genti dhe Saimiri kanë bërë një dedikim të ndjerë për gazetaren që punonte me ta, por që fatkeqësisht u nda nga jeta.
Gazetarja e “Stop”, Erinolda Isufaj humbi jetën të shtunën, pas një aksidenti tragjik ku një bllok mermeri u shkëput nga një kamion që udhëtonte para makinës ku ajo ndodhej.
“Dua t’ja dedikoj emisionin një vajze të mrekullueshme që nuk jeton më. Stafi i emisionit “Stop” i shpreh ngushëllime familjarëve të Erinoldës. Por dua që edhe nëpërmjet emisionit tonë të bëjmë një apel të fortë”: u shpreh Saimir Kodra.
Gazetarja 24-vjeçare ishte në makinë me prindërit e saj, dhe bashkëshortin. Prindërit dhe bashkëshorti janë jashtë rrezikut për jetën.
“I shprehim ngushëllime familjarëve të Erinoldës. Dua që nëpërmjet zërit tonë, madje vetë Eri po të ishte gjallë do ta thoshte këtë pjesë, sigurinë rrugore”: vazhdoi me tej Saimiri.
Duke marrë shkas nga kjo ngjarje tragjike, “Stop” solli disa raste, kur jeta e qytetarëve vihet në rrezik në rrugë, për shkak të shkeljeve, që arrijnë deri në absurd.
“Eri është në qiell, është në parajsë. Eri të kemi xhan. Do na mungosh”: tha Genti.
