Shqiptarët janë një popull që kanë treguar se dinë të protestojnë, mjaftojnë të kujtojmë “Lligjin për mbetjet”. Nga ana tjetër historia ka treguar sesi militantë të partive të ndryshme politike, kur kërkesat e tyre flasin për t’u bashkuar dimë të themi gjithmonë “po”.
Pavarësisht se ku ndodhet “një kërcënim”, të gjithë do të jemi një ditë të prekur prej tij. I tillë është edhe rreziku i ngritur prej muajsh nga ambientalistët dhe banorët e Divjakës.
Planet e ndërtimit të një qendre urbane dhe shkatërrimit të Parkut Kombëtar, të zonës Ramsar të Lagunës së Karavastasë, kanë bërë që ambientalistët të ngrenë alarmin.
“Iconstyle.al” renditi dje 3 pasojat nëse ky projekt i propozuar nga kompania “Mabetex Group” e Behxhet Pacollit miratohet nga qeveria shqiptare.
Nga ana tjetër duam t’ju kujtojmë vlerat dhe përfitimet për kujdesin ndaj këtyre zonave, që duhet të ketë çdo shqiptar.
Të gjithë jemi përgjegjës për vendin ku jetojmë. Bota na ka dëshmuar gjithmonë se ka një instinkt njerëzor për të ruajtur natyrën. Natyra tërheq diçka primitive në zemrat te tyre dhe duan ta mbajmë në atë mënyrë.
Mijëra parqe kombëtare, që përfaqësojnë miliona kilometra katrorë të zonave të mbrojtura janë krijuar në pothuajse 100 vende. Sa i përket Shqipërisë pavarësisht se ka 799 Zona të Mbrojtura, ka vetëm 15 Parqe Kombëtare me mbi 205 mijë ha ose 7,3% të territorit shqiptar.
Ndër to duhen përmendur Parku Kombëtar i Dajtit, Divjakë-Karavastasë, Butrintit, Tomorrit, Prespës etj.
Vlerësimi bienal i “Planeti i Mbrojtur”, i publikuar në 2016-n nga U.N. tregonte se 14.7% e tokës dhe 10% e ujërave territoriale në planet janë nën një formë mbrojtjeje. Por a është në dijeni Unioni Ndërkombëtar për Ruajtjen e Natyrës për kërcënimin e parqeve kombëtare në Shqipëri?
Kjo do të thotë që shifrat tregojnë një histori komplet tjetër, pasi 20% e shteteve u lejohet që të menaxhojnë vetë zonat e mbrojtura. Vetë ish-Presidenti Obama tha vitin e kaluar se “mbrojtja e hapësirave tona të shenjta është edhe më e rëndësishme gjatë shekullit të ardhshëm”.
Shansi jepet vetëm 1 herë
Ne kemi vetëm një shans për ta përdorur Tokën në mënyrën e duhur dhe mund të jemi të sigurt se nuk ka shanse të tjera nëse bëjmë shumë gabime fatale. Mbrojtja e biodiversitetit është një pjesë thelbësore e punës për të mbrojtur shtëpinë tonë. Biodiversiteti është diçka që është krijuar gjatë miliarda viteve të jetës në këtë planet.
Është procesi që krijoi një hapësirë për njerëzit në planet dhe siguroi që kushtet të ishin të mira jo vetëm që njerëzimi të mbijetonte, por edhe të lulëzonte. Parqet kombëtare ndihmojnë në mbrojtjen e biodiversitetit duke ofruar strehim për gjërat që janë shumë shpesh të shkatërruara nga prania e njeriut. Parqet ndihmojnë njerëzit të mbrojnë njëri-tjetrin nga vetja.
Arratisja e përkryer
Parqet kombëtare ofrojnë një mundësi unike për shqiptarët dhe vizitorët, që të përjetojnë hapësirën e pafundme që u ofron natyra. Janë arratisja për të gjetur paqen, aktivitete të ndryshme dhe një kënaqësi që nuk ta ofron asgjë tjetër.
Të ndihmojmë shëndetin tonë
Parqet nuk kanë vetëm histori, por të pasurojnë jetën, në mënyrë fizike dhe shpirtëroe. Vetë Amerika kuptoi pikërisht këtë efekt dhe nisi në 2011-n programin për transformimin e parqeve nga ambiente të thjeshta në hapësira që qëllimisht fuqizuan një strategji kombëtare shëndetësore. Por asnjëherë nuk vendosën t’i kthenin në qendra urbane.
Mbrojnë trashëgiminë kombëtare të kombit
Peizazhi natyror ka ekzistuar përpara se njerëzimi të mund ta shikonte. Peizazhet mahnitëse dhe pyjet e bukura janë një pjesë e rëndësishme e trashëgimisë së vendit tonë. Mbrojtja e tyre duhet të konsiderohet pjesë e vlerës së vendit.
Promovojnë turizmin
Parqet kombëtare janë një pjesë jetike e strategjisë së shteteve të ndryshme në botë për turizmin. Po në Shqipëri? Të gjithë e dimë që turizmi është një pjesë e rëndësishme e vendit tonë, por të pakta janë strategjitë për të mbrojtur burimet e të ardhurave.
Mund të bëhen një pjesë e Shqipërisë së ardhshme
Sistemi i parkut kombëtar mund të jetë një ide relativisht e re për vendin tonë. Përfitimet e sistemit të parkut kombëtar variojnë nga përfitimet shpirtërore te ato për të ruajtur biosfera të ndryshme në të gjithë vendin.
Përkundër këtyre përpjekjeve, parqet kombëtare në Shqipëri, sikurse në të gjithë botën janë vazhdimisht në rrezik. Ato përballen me kërcënimet e industrisë, ndryshimet klimatike, madje edhe me vetë qeverinë.
Megjithatë, kjo ishte vetëm një pjesë e vogël e arsyeve pse duhet të ngrihemi për të mbrojtur Parkun Kombëtarë të Divjakës. Vetë natyra e parqeve nuk është e orientuar për “sot”, por për “nesër”. Këto zona mund të vazhdojnë të luajnë një rol të rëndësishëm edhe në shekullin e 22-të, nëse i lëmë ato.
