Këngëtari Blero Muharremi publikoi pak ditë më parë klipin e këngës së tij më të fundit “Mbylli sytë”, një bashkëpunim me këngëtaren Albulena Ukaj. Papritmas kënga u fshi nga kanali “Yotube”, duke na befasuar të gjithë.
Ka qenë vet Blero, i cili e fshiu klipin. Këngëtari deklaroi se fshirja e projektit me artisten e re është bërë me kërkesë të fansave.
“Prej që ka dalë klipi ia nisi të shkojë shumë mirë, kam marrë shumë mesazhe nga fansat dhe ka qenë kërkesa e tyre që nuk u ka pëlqyer këngëtarja Albulena, pastaj mblodha ekipin tim dhe mora vendimin për ta larguar këngën”, është shprehur Blero.
Ai ka shtuar se ka gabuar me përzgjedhjen për Albulenën duke nënvizuar se në fakt, këngën do ta publikojë në versionin solo.
Por, kjo deklaratë e Bleros nuk i ka pëlqyer aspak Albulenës e cila pak orë më parë ka bërë një reagim. Ajo është shprehur se karrierën e saj e ka ndërtuar vetë, pa mbështetje të kushtëzuara, gjithnjë duke e pasur moralin, respektin dhe jo duke llogaritur në bashkëpunime.
“Të nderuar fansa, dëgjues të këngëve të mia, Ju bëj me dije se karrierën time e kam ndërtuar me mundësitë e mia, pa mbështetje të kushtëzuara, dhe gjithnjë duke e pasur parim moralin, respektin dhe lidhjen e ngushtë me familjen time të ndershme, e jo duke llogaritur në bashkëpunime apo çfarëdo qoftë tjetër.?Unë mbes kjo që jam andaj dua që gjithçka që ka të bëjë me karrierën time ta ndaj me juve miqtë e mi. Nëse kërkoni emrin tim, dhe nuk paraqitet një këngë ta dini se i kam arsyet morale që nuk gjindet, por ç’rëndësi ka ajo kur makina e kërkimit ua paraqet të tjerat materiale ku ju mund ti ndëgjoni e shihni. Ju dua,A.U.”: ka thënë Albulena.
