Të paktën 8 persona kanë vdekur nga një sulm terrorist që ndodhi dje në Manhattan të Nju Jorkut.
Agresori i cili besohet se ka qenë mysliman, ka bërtitur “Allahu Akbar” para se të shtypte për vdekje çiklistët me një kamion që po e drejtonte në drejtim të kundërt.
Më pas ai ka dalë nga mjeti dhe kërcënoi me një armë në dorë, duke detyruar policët e gjendur aty pranë të nxirrnin armët e tyre dhe të qëllonin. Agresori thuhet të jetë gjallë dhe është arrestuar, por është i plagosur.
Këngëtari Josh Groban shkroi në “Twitter” se kishte dëgjuar të shtëna me armë, teksa shëtiste me qenin e tij. “Oh Zot, sapo dëgjova të shtëna armësh. Nisa menjëherë të vrapoj me qenin tim”, është mesazhi i tij.
CNN citon burime nga Departamenti i Policisë së Nju Jorkut, që thonë se të paktën 8 persona dyshohen të vdekur. Ndërkohë, të paktën një oficer është qëlluar me armë dhe është plagosur lehtë, ndërsa gjendja e të plagosurve të tjerë ende nuk dihet.
Shumë vetë nisën të vraponin për të gjetur vendstrehime të sigurta, teksa shihnin kamionin të ecte në drejtim të këmbësorëve, pasi doli nga rruga.
Policia e Nju Jorkut nuk ka dhënë ende detaje të mëtejshme mbi situatën, por pamjet tmerruese nga vendngjarja, me çiklistë të rrëzuar përtokë dhe biçikletat e copëtuara përreth tyre, kanë përfunduar në rrjetet sociale dhe media.
Kalimtarë të rastit janë parë t’u ofrojnë ndihmën e shpejtë deri në mbërritjen e autoambulancave, ndërsa brenda shumë pak minutash nga raportimi i ngjarjes, një numër i madh forcash policore dhe zjarrfikësish u gjendën në vendngjarje.
Burimi: CNN
