Sot, Dritëro Agolli do të festonte ditëlindjen e tij të 86-të. Ai ndërroi jetë shkurtin e këtij viti nga një sëmundje e rëndë në mushkëri. Që nga ai moment i trishtë për letërsinë shqiptare, e bija e shkrimtarit Elona dhe gruaja e tij Sadija, kërkuan dorëshkrimet e lëna nga Agolli dhe vijnë me një surprizë për lexuesin vendas dhe jo vetëm.
Janë gjendur mjaftueshëm materiale për të botuar në ditëlindjen e tij dy libra të rinj. Elona që kërkoi më së shumti në raftet e të atit thotë se librat janë plotësimi i një amaneti të fshehtë të Dritëroit. Ndërsa Sadija thotë se ka ende shumë dorëshkrime të pabotuara.
Veprat e reja quhen “E bukura, lozonjarja, tokësorja grua” dhe një libër me aforizma të titulluar “Nulla dies sine linea” (asnjë ditë pa një rresht), shkruan “shqiptarja.com”. Pasditen e sotme do të mbahet një aktivitet përkujtimor në ambientet e Muzeut Kombëtar në nder të shkrimtarit të madh.
