Këndi i lojërave për fëmijë “7 xhuxhat” që ndodhet në Rrugën e Elbasanit, do të ndryshojë rrënjësisht pamjen e tij.
“Tirana post” shkruan se ai do të jetë një park i ndarë në disa module ku do të shpërndahen lojërat dhe hapësira të ndryshme me shatërvan, lojën e madhe të shahut, sheshin e pasqyrave etj.
Por krahas ndërtimit të një ambienti të këndshëm për fëmijët, bashkia ka parashikuar ndërtimin e një parkimi nëntokësor me 148 vende parkimi për të gjithë prindërit që duan të sjellin fëmijët aty.
Në katin e parë nëntokësor do të vendosen edhe nyjet higjenosanitare që do t’i shërbejnë parkut të lojërave, në mënyrë të ngjashme me atë ekzistues nën Sheshin “Skënderbej”. Bashkia e Tiranës ka hapur të premten tenderin për realizimin e këtij projekti, me një fond limit prej 276 milionë lekësh. Pas shpalljes së operatorit fitues, punimet pritet të zgjasin 2 vjet.
Siç duket edhe nga fotot, projekti është një përmbledhje e disa copëzave të ndryshme, të cilat falë formës modulare do të mund të shkrihen në parkun e lojërave. Ai do të jetë i pajisur edhe me rrëshqitëse, platforma metalike për t’u ulur, një labirint të gjelbër, një lojë të ngjitjes në shkëmbinj, shatërvan, ndërsa krahas bimësisë brenda rrethimit, nga jashtë do të kufizohet nga pemë të larta dhe jo me mure apo kangjella si aktualisht.
