Shqipëria luajti sot në Spanjë ndeshjen e 9 në Grupin G të kualifikueseve të Kupës së Botës “Rusi 2018”.
Të besuarit e Kristian Panuçit patën një mision shumë të vështirë përballë një skuadre, që mori zyrtarisht biletën e kualifikimit në Botëror.
Kombëtarja jonë nuk ka mundur të rezistojë gjatë pasi në rrjetën tonë kanë përfunduar 3 gola në pak minuta.
Të dy ekipet kishin një numër të madh mungesash për pezullime dhe dëmtime. Trajneri Kristian Panuçi ka zgjedhur të bëjë disa ndryshime duke hedhur në fushë një skuadër me formacionin 5-3-2.
Ai ka ulur në stol kapitenin Agolli dhe sulmuesin Sadiku, ndërkohë që nga fillimi e nisin Balliu, Memolla, Veseli, Grezda dhe Llullaku. Shiritin e kapitenit të kuqezinjve sot e mban portieri Etrit Berisha.
Dy risi në formacionin titullar të Spanjës për ndeshjen e sotme kundër Shqipërisë. Trajneri Lopetegui ka zbritur në fushën e lojës mbrojtësin 21-vjeçar të Sociedadit, Odriozola dhe sulmuesin Rodrigo.
Ditën e djeshme ai kishte provuar Azpilikuetën në të djathtë dhe Adurizin në majën e sulmit, por në minutat e fundit vendosi të bënte këtë ndryshim që të luanin në fushë 2 të rinj.
