Një këngë kushtuar dashurisë, por jo nga ato që jeni mësuar të dëgjoni: pa fjalë banale dhe pa lakuriqësi.
Vetëm Elhaida Dani do të dinte të sillte tinguj e fjalë të tilla të munguara në tregun muzikor shqiptar.
Këngëtarja shqiptare vendosi të sillte këtë herë “Më mbaj”, ku ajo nuk është vetëm vokaliste, por edhe kompozitore dhe autore e tekstit. Domethënë një këngë e realizuar e gjitha prej saj dhe me bashkëpunimin e Dj Oltit.
“Kjo këngë është ndryshe nga ato çfarë kam sjellë deri sot. E thjeshtë, e drejtpërdrejtë dhe personale”, është shprehur Elhaida gjatë postimeve në rrjetet sociale.
Një këngë e qetë, melankolike (sigurisht për dashurinë) rikthen Danin në tregun muzikor shqiptar me shpresën për të qëndruar gjatë.
Po klipi?
Nga reagimet e para të ndjekësve të tij, kuptojmë që nuk janë zhgënjyer, madje kanë marrë atë që i mungon kaq shumë klipeve shqiptare: më pak lëkurë dhe më shumë ndjenjë.
“Shyqyr një videoklip pa përmbajtje të tepruar lakuriqësie”, shkruan një komentues poshtë klipit.
Ndërsa një tjetër i përgjigjet dikujt që shprehet se nuk i duket interesant:
“Nuk është interesante sepse jeni mësuar me videoklipe të tjera. Jeni mësuar me tekste me sharje e fjalë banale. Elhaida është mundur me sjellë një këngë që po i mungon tregut muzikor. Dhe bravo i qoftë, sepse ia doli”.
Burimi: Iconstyle.al
