Aktori i njohur i humorit, Agron Llakaj, në vitin 2010 la “Portokallinë”, lajm ky, që bëri bujë në atë kohë, kjo sepse arsyet ishin të panjohura, dhe aktori nuk preferoi kurrë të fliste për to.
I ftuar në “Xing me Ermalin”, Llakaj ka treguar për herë të parë arsyet, se përse është larguar nga “Portokallia”.
“Unë nuk e lashë Portokallinë për Klanin. Thanë që Agroni u pagua etj…Artisi nuk bën dot kompromis me profesionin e vet dhe me vehten. Si i tillë unë kërkoja të lëvizja. Unë ofrova diçka për ndryshim, por mendimi im nuk u përqafua dhe prej momentit, kur nuk prodhon më vlerë e kthehet në një lloj monotonie, mirë është që të largohesh. Unë nuk kam pranuar ndonjëherë që të jem i varur në çengel, që dikush të më lëvizë majtas apo djathtas”, – u shpreh Llakaj.
“Isha i ftuar nga Ardit Gjebrea në “Kënga Magjike” dhe për të qenë brenda marrëdhënies dhe etikës artistike e njoftova regjisorin, Altin Bashën. Nuk i mora leje, por e informova. Mbrëmjen e asaj të shtune dola tek “Kënga Magjike”. Të nesërmen, që ishte “Portokallia” në transmetim, shoh që ishin hequr të gjitha materialet e mia. Aty kuptova, që unë isha i dënuar. Të hënën në mëngjes më thirri drejtori i përgjithshëm i “Top Channel” dhe më tha:
‘Nga ky moment e mbrapa deri sa të mbarosh kontratën, deri në fund të dhjetorit do jesh thjesht drejtor artistik dhe nuk do dalësh në skenë’. I thashë:
‘Jeta ime është e lidhur me skenën, drejtorin mbajeni për veten tuaj dhe u largova”, – tregoi ai.
“Ata më respektuan, më mbajtën dy rroga”, – përfundoi Agron Llakaj.
