“Për herë të fundit më mbaj…”! Vetëm këto fjalë u zbuluan nga Elhaida Dani për këngën e saj më të fundit që pritet të publikohet, më 2 tetor. Pavarësisht se në 2 vite këngëtarja shqiptare nuk ka sjellë projekte muzikore, ajo vazhdonte karrierën si pjesë e muzikalit francez “Notre Dame de Paris”, bashkë me Riccardo Cocciante.
Kuriozë se për çfarë flet kënga, për muzikën dhe detajet e veshjes, ne ju sjellim katër detaje dhe të jeni të bindur se Elhaida ka rezervuar surpriza.
E para, në këtë projekt të ri muzikor “Më mbaj”, Dani nuk është vetëm vokaliste, por edhe kompozitore dhe autore e tekstit. Domethënë një këngë e realizuar e gjitha prej saj.
E dyta, nëse menduat se kjo nënkupton, që këngëtarja ka përfshirë në të emocionet nga jeta e saj personale, atëherë keni të drejtë. “Kjo këngë është ndryshe nga ato çfarë kam sjellë deri sot. E thjeshtë, e drejtpërdrejtë dhe personale”, është shprehur Elhaida gjatë postimeve në rrjetet sociale.
E treta, nuk është një baladë! Dani duket se është e përfshirë nga dëshira për të eksperimentuar me rryma të reja, si pop-folk të remiksuar nga Dj Olti.
E katërta për paraqitjen. Preferoi të sjell diçka jo shumë serioze, siç ndoshta mund të jeni mësuar ta shikoni më parë, por më shumë drejt sensuales. Një fustani tyli kur je e laguar bën efektin e duhur.
Por kjo nuk do të jetë projekti i vetëm muzikore i Elhaidës. Ajo ka treguar se do të bashkëpunojë me producentin e Sia-s, Arthur Pringley, si dhe së shpejti do të vijë në një bashkëpunim me Durim Morinën.
Burimi: Iconstyle.al
