Deklarata e imamit Elvis Naçi, i cili thotë se arsyeja e tradhtisë bashkëshortore është femra e cila “ia var vetes”, nuk zbukurohet dhe e le veten të shëndoshet, nuk është pritur mirë nga femrat.
E para që reagoi dje ishte gazetarja Fatma Haxhialiu, e cila ironizoi deklaratën e çuditshme të imamit. Reagim pati edhe nga këngëtarja Barbana, e cila e cilësoi imamin si avokat të meshkujve që tradhtojnë.
“Elvis Naçi më zhgënjeve! Ti nuk je asgjë tjetër përveçse një avokat i meshkujve që tradhtojnë! Ti nuk bën asgjë më shumë, vetëm po përpiqesh që fajtorët t’i kthesh në viktima dhe viktimat ne fajtor! Në bazën e harmonisë së një familjeje nuk mund të jetë dieta dhe kthimi i gruas në skllave seksi për burrin. Femra që predikon ti nuk ka lidhje me Shqipërinë. Ky tip femre që duhet ti “bindet” verbërisht burrit dhe të ndihet gjithmonë fajtore gjendet në shkretëtirat e Arabisë Saudite e tufëzuar në poligaminë e Beduinëve! Këtu tek ne marrëdhëniet ndërtohen mbi dashuri reciproke, që nënkupton dhe detyrimin reciprok por ti s’mund ta kuptosh sepse fjala dashuri nuk ekziston në terminologjinë e Sheriatit sipas të cilit femra blihet si një plaçke gabi. Meqenëse, mesa kam parë, paske vendosur që ta zhvillosh predikimin tënd ne rrjetet më moderne sociale të kohës “Facebook” apo “Instagram” do dëshiroja që dhe interpretimet e tua t’i përshtateshin nivelit të kohës”, shkruan Barbana.
Reagime të shumta ka pasur edhe nga fansat e Iconstyle.al në “Facebook”, të cilat e quajnë maskilizëm dhe injorancë atë që imami thotë.
“Dhe burri mqns ajo femra që rri gjithë natën zgjuar me fëmijën, që ka 1000 strese për fëmijën, që e ka mbajt 9 muaj në bark e ka ushqyer me gjakun e vet, le ta tradhtojë se ka femra jashtë që e mbajnë veten dhe i plotësokan nevojat”, shkruan me ironi një nga komentueset.
