Sot më në fund erdhi dita që shumë nga kryeqytetasit e prisnin: do të hapet “Unaza e Madhe”.
Pjesa nga Shkolla Teknologjike deri tek Kopshti Zoologjik ka përfunduar. Vetë kryeministri Rama përmes statusit të tij të mëngjesit në “Facebook”, e ka bërë me dije këtë fakt. Ashtu siç pritej kjo pjesë e unazës hapet para nisjes së vitit të ri shkollor 2017-2018.
“Mirëmëngjes, dhe ju uroj një ditë të mbarë me këto pamje të Unazës së Re të Tiranës që është hapur sot duke lidhur shumë më shpejt dy zona të mëdha të qytetit siç janë Njësia 5 e Kombinati, si edhe duke lehtësuar trakun e automjeteve në aksin Durrës-Tiranë-Elbasan. Punimet e kryera me standardet më të mira europiane përfshijnë 3 kalime këmbësorësh nga zona e Kristalit në Selitë, ashensor për PAK në mbikalim, si dhe 12 hyrje-dalje”, shkruan Rama në “Facebook”.
