Më 26 maj deputeti i LSI-së Gjovalin Kadeli humbi jetën, pas një sëmundje të rëndë.
Sigurisht që ka qenë një humbje e madhe jo vetëm për familjen e miqtë e tij, por edhe për politikën shqiptare.
Mbrëmjen e djeshme djali i tij është martuar dhe Monika Kryemadhi ka bërë një dedikim të ndjerë për deputetin.
Kryetarja e LSI-së ka publikuar një video gjatë dasmës së djalit të tij e bashkangjitur me të ka shkruar:
“I dashur Gjovalin, ti nuk je sot këtu me ne fizikisht. Por prania jote është kudo në këtë ditë të veçantë për djalin tënd të madh, te çdo familjar, te miqtë e shokët që po gëzojnë për martesën e Adit dhe Erjelës, te nëna Liza që i sheh fëmijët e tu që gëzojnë dhe martojnë vëllain e tyre, te Lirida, Adela dhe i vogli, Iridiani, që nuk është më i vogël, por burrë, që na priti të gjithëve sipas traditës që ti i mësove. Të të trashëgohet djali Gjovalin! Jam e bindur që po e sheh nga lart dhe po gëzon”.
Të pranishëm në ceremoni ishin edhe ish-deputeti socialist Namik Dokle, deputetë të LSI, mes tyre Viktor Tushaj dhe Lefter Koka.
Ky i fundit ka postuar një video në faqen e tij në fb, nga gëzimi familjar i familjes Kadeli ku ka zbuluar dhe një merak të mikut dhe kolegut të tij të ndjerë.
“Se jeta ka dhe gëzime! Me trashëgime Admir e Orjela, jetë të lumtur dhe bekimet e Zotit të keni! Me siguri Gjovja sheh nga lart e po ju bekon me buzëqeshjen e tij, ashtu si vetëm ai qeshte e po gëzon bashkë me ne kurorëzimin tuaj! U bë siç ti Gjove deshe, një dasmë ku të mblidheshim të gjithë bashkë fëmijët e tu, nëna jote, familjarët, të dashurit e gjithë miqtë e tu, të gëzonim! Na mungon të gjithëve miku im i zemrës! Urime nga zemra e jetë të gjatë bashkë Admir & Orjela!”, shkruan Koka.
