Pavarësisht se e kemi pasur para syve, nuk e kishim vënë re ngjashmërinë e Eva Muratit me aktoren italiane Manuela Arcuri, por ngatërresa e djeshme mes të dyjave në një faqe interneti, na bëri të gjithëve ta shihnim me atë sy.
Eva, “e inspiruar” nga lajmet që u shkruan rreth kësaj ngatërrese për shkak të ngjashmërisë, ka postuar një foto me Manuela Arcuri-n.
Janë takuar me të vërtetë katër vjet më parë, kur aktorja italiane erdhi në emisionin që ajo moderonte:
“Nëntor 2013, në korridoret e Agon Channel mbas intervistës për programin tim Antilope me karabinieren e bukur. Padyshim 18-vjecarja më e lumtur në botë. Ps: inspiruar nga ngjarjet e sotme mediatike”, shkruan prezantuesja e bukur shqiptare, e cila është e angazhuar edhe në projekte kinematografike.
Kjo është fotoja më e mirë për ta kuptuar që janë dy të ndryshme, Manuela mesdhetarja plot sharm dhe Eva, modelja elegante ende shumë e re në moshë.
Në ato vite, Eva kishte zgjedhur ca fije ngjyrë mjalti që ndërhyjnë pak te ngjashmëria, por ka edhe shumë foto të tjera kur ato kanë të njëjtën ngjyrë flokësh dhe të njëjtën nuancë mesdhetare lëkure që i bënë disi të përafërta.
Eva thotë që atëherë ishte 18-vjeçarja më e lumtur që e takoi!
