Një tërmet me magnitudë 4 ballë është regjistruar mbrëmjen e kaluar në ishullin Ischia në Itali, ku për pasojë kanë humbur jetën dy persona dhe janë plagosur 39 të tjerë.
Lëkundjet e tërmetit janë ndjerë edhe në zona të tjera të ishullit, si në Barano dhe Forio. Por përveç ngjarjes së rëndë, një mrekulli ka ndodhur.
Sipas mediave italiane, një foshnje 7-muajshe është arritur të nxirret e gjallë nga rrënojat pas shtatë orësh kërkime. Sakaq autoritetet italiane po vazhdojnë punën për të bërë të mundur shpëtimin e sa më shumë jetëve.Kërkuesit e cilësuan këtë një mrekulli.
Ishulli pranë brigjeve të Napolit ka një popullatë prej rreth 50 mijë banorësh dhe është shumë i frekuentuar nga turistët. Fotografitë e shpërndara në mediat sociale tregonin dëmet e mëdha që i janë shkaktuar ndërtesave, përfshirë edhe një kishë historike. Raportet thonë se edhe një spital është evakuuar për shkak të dëmeve të pësuara.
Ekipet e emergjencës janë transportuar me traget dhe helikopterë drejt ishullit, ndërkohë që një pjesë e tyre ndodhej në ishull për shkak të zjarreve të lokalizuara atje më herët. Ndërsa Instituti Kombëtar Italian i Gjeofizikës dhe Vullkaneve e ka përcaktuar si një tërmet 4-ballësh, ndërsa homologët e tij evropianë dhe amerikanë flasin për një lëkundje toke 4.3-ballëshe.
