Ajo njihet si një nga artistet më të suksesshme të viteve ’90, me albume me shitje marramendëse e hite të paharrueshme si “Nothing Compares To You”.
Sot është 50 vjeç dhe ndryshe nga jeta që Sinead O’Connor mund të kishte menduar dikur si një artiste e suksesshme.
Këngëtarja prej disa vitesh vuan nga probleme të shëndetit mendor si bipolariteti dhe depresioni, gjë që e ka shtyrë disa herë drejt tentativave të vetëvrasjes.
Së fundmi ajo ka tronditur fansat me një video rrëqethëse në Facebook, ku tregon se tashmë jeton e vetme në një hotel në Nju Xhersi dhe ka menduar shpesh për vetëvrasjen.
“Jam tërësisht e vetme. Nuk kam asnjë njeri tjetër në jetë përveç psikiatrit tim, njeriut më të ëmbël në botë, që thotë se unë jam heroi i tij. Dhe kjo është e vetmja gjë që më mban në jetë tani, gjë që është disi patetike”, u shpreh duke qarë nëna e 4 fëmijëve që mesa duket e kanë braktisur.
“Po e bëj këtë video sepse dua që të gjithë të shohin se ç’do të thotë. Sëmundjet e shëndetit mendor janë si droga, nuk i plas fare se kush je ti dhe po kaq keq është dhe stigma rreth tyre. Papritur të gjithë njerëzit që supozohet se të duan dhe duhet të kujdesen për ty të trajtojnë si plehrë”, u shpreh O’Connor.
Këngëtarja irlandeze e cila ka 4 fëmijë dhe është martuar 4 herë, tregon se si ajo ndihet vetëm dhe po lufton për të qëndruar gjallë çdo ditë.
Një grua tha se O’Connor ka një javë që po qëndron në një motel me 70 euro nata.
