Prej 5 vitesh kënga e koreano-jugorit PSY ka siguruar fronin në “YouTube”. Kënga e klikuar më shumë se të gjitha të tjerat nuk është rrezikuar nga “sulmet” në gjithë këto vite, por më në fund ka dorëzuar fronin.
“Gangnam Style” ka kaluar në vend të dytë, në listën e këngëve më të klikuara dhe në vend të saj është ngjitur kënga e Wiz Khalifa-s dhe Charlie Puth, “See You Again”, një hit që i dedikohet artistit të Fast & Furious që humbi jetën, Paul Walker.
“See You Again” regjistron plot 2.896.199.993 klikime, ndërkohë që ndiqet me disa shifra më pak nga PSY me 2.894.708.868.
Megjithatë, kënga e Wiz Khalifa-s është publikuar në vitin 2015, 3 vjet më vonë se Gangnam Style, kështu që pritet që shifrat të vazhdojnë të rriten.
Ndërkohë, surprizë për “YouTube” vazhdon të jetë kënga e Luis Fonsit, “Despacito”, e cila, edhe pse ka vetëm 6 muaj që është publikuar, po u afrohet frikshëm artistëve të mësipërm.
Aktualisht, “Despacito” ka regjistruar në “YouTube” plot 2.486.448.399 klikime dhe me siguri, gjatë kësaj vere do të thyejë rekordin që mban prej vitesh PSY.
