Ndërsa Shqipëria përgatitet për të zgjedhur partinë që do të drejtojë, Petri Bozo dhe stafi i tij përgatiten për zgjedhjen e vajzës më të bukur shqiptare për të 19 vit.
Të premten, më 16 qershor, do të organizohet Miss Shqipëria 2018. Për të parin vit, këtë herë, spektakli që zhvillohet në një kala të Shqipërisë, do të organizohet në Kalanë e Tepelenës, e cila për shkak të ndërtimeve pa leje kishte qenë deri më tani e pashfrytëzueshme.
Në një intervistë për gazetaren Gerilina Kodheli në faqet e “Bluetooth” të Gazetës Shqiptare, producenti dhe regjisori Petri Bozo ka treguar sekretet e organizimit të sivjetshëm.
Do të jenë 31 konkurrente që do të garojnë për titullin Miss Shqipëria. Sipas Bozos, produksioni ka zgjedhur vajza jo thjesht të bukura, por edhe inteligjente. Për herë të parë, mungojnë vajzat nga Kosova, por do të ketë bukuroshe nga qytete të ndryshme shqiptare dhe diaspora.
Të ftuarit, janë si nga muzika popullore dhe ajo moderne, ku veçojmë këngëtarët Flaka Krelani, Aleksandër Gjoka, Renis Gjoka, Devis Xherahu etj.
Një kusht i rëndësishëm që iu është vendosur vajzave konkurrente është bukuria e tyre natyrale. “Konkurrentet janë 100 për qind natyrale. Nuk pranojmë asnjë konkurrente që të ketë bërë ndërhyrje, që është evidente nga syri i ekspertëve që i gjykojnë kur mbarojnë audicionet”, ka thënë Bozo.
